DILI, 24 Setembru 2025 (TATOLI) — Diretór Servisu Apoiu Diagnóstika no Terapéutika HNGV, Vidal Lopes, klarifika kondisaun iha sala pediatria ba inan sira, maibé fatin ne’e ba bebé sira-ne’ebé hasoru problema prematura.
Diretór Servisu Apoiu Diagnóstiku no Terapéutiku iha HNGV, Vidal de Jesus Lopes, rekoñese akontesimentu ne’ebé virál iha rede sosiál, liuliu iha sala pediatria rua iha Ospitál Nasionál Guido Valadares.
Nia fó-sai katak, kestaun ne’ebé virál iha mídia sosiál ne’e iha sala pediatria rua ne’e, sala ne’e bolu naran RG ka funsionariu sira bolu rawat gabung, ne’e ba pasiente ka inan sira-ne’ebé mak partu.
“Maibé bebé mak iha problema, hanesan moris mai ho permatura ka todan ne’ebé mak menus, bebé sira-ne’ebé mak moris mai haan fo’er, iha infeksaun presiza kompleta nia antibiótiku ba loron rua ka loron lima, depois hotu ne’e mak alta,” Vidal de Jesus Lopes, klarifika iha HNGV, ohin.
Nia esplika, bebé deit mak iha problema la’ós inan sira hasoru problema tanba ne’e inan sira bele fó susu iha kadeira ne’ebé mak HNGV prepara la’ós toba iha rai.
“Laiha problema ho nia inan, bebé nia inan ne’e mak hein de’it, agora kama ki’ik-oan ba bebé ne’e iha, hamutuk 14 iha-ne’ebá, inan sira-ne’e mai tuur hein de’it, laiha problema ho inan, problema ne’e ho labarik,” nia informa.
Nia hatutan, kondisaun kadeira iha ne’ebá ne’e mak Hospitál Nasionál Guido Valadares tenke kria kadeira ida lipat ne’e, nune’e inan sira bele sadere oituan, depois fó susu no jere tempu bele fila uma.
“Depois iha-ne’ebá mós kria kondisaun breastfeeding, bainhira inan sira-ne’ebé mak mai tarde oituan bele hois sira-nia susunbeen ne’e, tanba iha mesin susubeen ne’ebé rai hela iha-ne’ebá, tau iha jeleira nune’e enfermeiru sira mak fó susubeen ba bebé ne’e mós iha entaun ida-ne’e la iha problema,” nia katak.
Nia relata, kondisaun ne’e la’os foin agora, kuaze tinan 10 ona, hahú iha 2014 no 2015 husik ne’eba kedas la kria kondisaun ka la prepara kama ba nian inan sira, maibé ba labarik de’it.
“Ami sei tuur hamutuk, atu kria kondisaun, karik presiza tanba espasu agora atualmente HNGV limitadu, iha laran ami tenke kria kondisaun ba bebé nia inan sira, signifika na’in-neen de’it mak presiza iha laran, ualu ne’e ita atu dudu ba ne’ebé, espasu laiha, ita hein edifísiu foun ne’e mak ita foin prepara, ita atu rezolve problema foun, maibé ita kria fali problema foun mós bele akontese,” nia haktuir.
Nia rekoñese inan balun toba iha rai hodi fó susu bebé mak futuru presiza kria kondisaun hodi fó solusaun ba problema hirak-ne’e.
Apolónia Mendonça nu’udar pasiente informa, foto ne’ebé mak virál hodi kalan ne’e, parte ida sira agradese atu mídia sira bele haree no mós Ministériu Saúde mós bele haree, atubele fasilita kadeira no kama ba pasiente sira iha ne’e halo tratamentu iha HNGV.
“Iha parte ida mós ha’u triste tanba laiha konsiderasaun, sira hasai foto laiha lisensa atu husu ba inan ho ona ne’ebé mak tuur hela, tanba hodi kalan toba duni iha rai mas la’ós intensaun atu hatoba rai, tanba tuur ladún di’ak tanba pontu ne’ebé mak suku sei moras, entaun ha’u hatoba bebé atu fó susu, la’ós atu intensaun atu hatoba bebé ba rai ne’e la iha,” Apolónia klarifika. Mendonsa,klarifika.
Nia dehan, bebé baixa iha HNGV durante loron haat ona tanba bebé rasik moras isin manas
“Daudaun ne’e bebé nia kondisaun di’ak oituan, tanba nia isin manas mak lori mai maibé agora di’ak ona, hein de’it kompleta antibiótiku hotu bele fila uma ona,” nia konklui.
Jornalista : Felicidade Ximenes
Editór: Evaristo Soares Martins
