OEKUSI, 25 Setembru 2025 (TATOLI) – Xefe Departamentu ba Moras Hada’et no La Hada’et iha servisu saúde, Rejiaun Administrativa Espesiál Oekusi Ambeno (RAEOA), Domingos Fatubai, informa, estoke ai-moruk Antri Retro Virál (ARV), atu fó tratamentu ba pasiente HIV-SIDA Ospitál Referál Oekusi sufisiente.
Domingos Fatubai, relata, tanba kazu infetadu ba vírus HIV-SIDA iha Oekusi, daudaun ne’e rejista ona ema na’in-96, tan ne’e, presiza estoke ARV, tanba tratamentu ba pasiente sira tenke rutina.
“Kona-ba ai-moruk ARV ne’e sufisiente. Bainhira estoke menus, husi responsavel programa, submete pedidu ba nasionál, nune’e bele distribui mai saúde rejionál Oekusi. Ne’ebé, agora daudaun estoke iha hela,” nia informa iha suku Taiboko, ohin.
Na’in-rua la iha komunikasaun
Autoridade saúde konfirma, pasiente 96 ne’e, maioria hetan akompañamentu husi profisionál saúde ba tratamentu, maibé balun seidauk iha konsiénsia hodi koopera ho fasilidade saúde no na’in-rua lakon komunikasaun.
Notísia relevante:INCSIDA kontinua divulga transmisaun no prevensaun vírus HIV-SIDA iha Taiboko
“Dadus jerál HIV-SIDA iha Oekusi hamutuk 96. Husi númeru ne’e iha suku Taiboko, daudaun ita halo sensibilizasaun iha ne’e, rejista kazu ida, tuir polítika implementasaun ba programa ne’e. Durante ne’e ita la’o tuir protokolu. Husi 96 ne’e, balun ita halo hela observasaun, balun kumpre halo tratamentu só ema na’in-rua mak viajen ba mai laiha komunikasaun, no balun laiha konsiénsia atu halo tratamentu tanba distánsia dook husi fasilidade saúde. Maibé, ita-nia responsavel saúde sira kontinua buka sira hodi koopera,” nia realsa.
Tuir ezekutivu, ba pasiente HIV-SIDA ne’ebé rejista na’in-ida iha suku Taiboko, temporariamente hala’o hela tratamentu no hetan kontrola másimu husi pesoál saúde sira iha postu saúde Oélkaem,
Notísia relevante:Kuidadu ho vírus HIV/SIDA, ‘sensitivu’ hada’et liuhusi dalan tolu
Jornalista: Abílio Elo Nini
Editór: Rafael Ximenes de A. Belo
