OEKUSI, 26 Setembru 2025 (TATOLI) – Xefe Estadu Maior Jenerál, FALINTIL-Forsa Defeza Timor-Leste (F-FDTL), Tenente Falur Rate Laek, sesta ne’e, hala’o vizita ofisiál ba F-FDTL komponente navál no terrestre, ne’ebé destakadu iha Rejiaun Administrativa Espesiál Oekusi Ambeno (RAEOA).
Iha sorumutu ofisiál ne’e, Xefe Estadu Maior Jenerál F-FDTL Tenente Falur Rate Laek, enkoraja, atu mantein kooperasaun iha fatin hot-hotu, ho instituisaun Estadu no komunidade sira, nune’e bele hametin relasaun amizade ho ema hotu iha rai-ketan Oekusi.
“Ha’u-nia rekomendasaun ba membru sira katak, mantein sira-nia kooperasaun iha fatin hot-hotu, ho instituisaun sira no komunidade sira, atu hametin ita-nia relasaun amizade ho ema hotu, atu ita-nia kompromisu ne’e iha valór ba ema hotu,” Falur ko’alia hafoin enkontru ho membru F-FDTL sira iha komponente navál, bairru Oébau, ohin.
Imajen TATOLI/Abílio Elo Nini
Nia informa, Komandu F-DTL sei hasai diretiva ida ba RAEOA atu forma tarrefa serbisu hamutuk ho Polísia Nasionál Timor-Leste (PNTL), ho objetivu atu fó seguransa ba komunidade sira iha Oekusi, tantu kalan no loron.
“Iha tempu-badak sei iha diretiva ida mai husi komandu, atu forma forsa tarefa konjunta ho PNTL, atu hala’o atividade apoia seguransa iha kestaun pontuál balun, sira-bele envolve fizikamente ba, maibé ein-prinsipíu misaun importante ne’ebé ha’u fó, mak hotu-hotu tenke kontribui ho informasaun, hotu-hotu partisipa atividade ne’ebé de’it ba asuntu sosio-ekonómiku, sosio-polítiku, informasaun kona-ba seguransa, estabilidade, no informasaun ba kooperasaun sira, atu fó feedback, depois ita hadi’a serbisu sira iha rai ne’e,” nia hateten.
Notísia relevante:Falur ho Autoridade RAEOA diskute kooperasaun servisu
Iha ámbitu sorumutu ne’e, kada komponente tantu navál no terrestre, planu no atividade sira, aprezenta mós planu serbisu, ne’ebé hatudu progresu di’ak.
“Sira (membru) nia serbisu exelente. Ohin, sira halo aprezentasaun ba programa atividade sira ho sistematiku klaru no sintétiku tanba bele komprende lalais, saida mak sira halo, ne’e reflexu ba sira-nia serbisu di’ak. Ne’ebé, ba ha’u apresia,” nia orgullu.
Notísia relevante:Tenente Jenerál Falur komprometidu kontinua fortifika formasaun ba F-FDTL
Entretantu, tuir ajenda ne’ebé Ajénsia TATOLI,I.P asesu, hafoin enkontru ho Autoridade RAEOA, Xefe Estadu Maior Jenerál, F-FDTL), Tenente Falur Rate Laek, kontinua viajén ba sub-rejiaun hodi observa situasaun iha fronteira no parte lorokraik hala’o vizita ba postu F-FDTL destaku Oekusi hanesan komponente terrestre iha Sikone suku Lalisuk no komponente navál iha bairru Oébu suku Costa.
Tuir planu, iha loron sábadu, 27 Setembru 2025, sei kontinua dezloka ba sub-rejiaun Nítibe atu observa situasaun iha fronteira sira.
Jornalista: Abílio Elo Nini
Editór: Rafael Ximenes de A. Belo
