DILI, 26 Setembru 2025 (TATOLI)–Prezidente Institutu Defeza Direitu Labarik (INDDICA-sigla portugeza), Dinorah Granadeiro prepara $15.000 hodi fasilita família labarik sira-ne’ebé fa’an hahán iha dalan públiku.
“Osan ne’e hodi halo negósiu regulár hanesan loke kioske ki’ik sira iha uma, nune’e labele haruka labarik sira ba fa’an iha dalan, tanba fa’an sasán estrada ne’e perigu ba labarik sira-nia vida,” Dinorah afirma ba jornalista sira iha nia kna’ar fatin, Sesta ne’e.
Notísia relevante: INDDICA halo ona konsulta Planu Asaun Nasionál ba Labarik iha munisípiu neen
Nia dehan apoiu ida-ne’e la’ós ba labarik hotu-hotu maibé ba família sira-ne’ebé konsidera ekonomia ladún sufisiente no oras ne’e sei halo identifikasaun ba labarik sira.
Prezidente INDDICA relata programa apoiu ba família ho rendimentu ki’ik antes ne’e hetan apoiu husi Ministériu Solidariedade Sosiál no Inkluzaun (MSSI), maibé tinan oin INDDICA sei fó apoiu ba família vulneravel sira.
Iha fulan-Jullu nia rohan to’o agora, INDDICA rejista labarik ne’ebé halo negósiu iha dalan públiku hamutuk 50.
Jornalista: Osória Marques
Editór: Xisto Freitas da Piedade
