BOBONARU, 29 Setembru 2025 (TATOLI) – Vise-Primeiru-Ministru no Ministru Koordenadór ba Asuntu Sosiál no Ministru Dezenvolvimentu Rurál no Abitasaun Komunitária, Mariano Assanami Sabino, halo diálogu ba pás ho estudante no manorin sira iha Bobonaru hanesan formasaun karáter ba konstrusaun pás, Estadu no nasaun.
Iha intervensaun, Assanami husu ba estudante sira atu promove pás no estabilidade, liuhusi hadomi-malu, respeita-malu, dignifika no valoriza malu, tanba Timor-Leste nia objetivu prinsipál ida iha períodu luta nian mak hakarak hetan estabilidade.
“Ita-nia luta tanba ita laiha pás, laiha estabilidade, ema la respeitu ita, ema la dignifika ita no ema tolok, trata, hatama ita bá kadeia. Ita-nia inan-aman sira ema halo torturasaun, laiha lei, tanba ne’e ita-nia luta iha objetivu prinsipál ida mak iha imi-nia jerasaun, depoizde ukun-an tenke iha estabilidade”, nia hato’o iha atividade ne’ebé realiza iha Zinájiu Maliana.
Membru rezisténsia husi organizasaun RENETIL ne’e afirma iha períodu ukun-an presiza kria rekonsialiasaun iha fronteira Bobonaru, Kovalima no Rejiaun Administrativa Espesiál Oekusi Ambenu (RAEOA), nune’e komunidade bele moris hakmatek.
Iha sorin seluk, Ministra Edukasaun, Dulce de Jesus, fiar katak mensajen importante husi Vise-Primeiru-Ministru nia ne’e estudante sira sei tau iha prátika.
“Dalaruma iha fatin balu mosu problema entre estudante no estudante no estudante no profesór, inklui eskola no eskola hanesan akontese tinan hirak liubá iha Maliana, más graças a Deus agora la akontese ona”, nia relembra.
Diálogu ne’e partipa mós husi Komandante Polísia Munisípiu Bobonaru, Superintendente Xefe Agustinho Gomes da Silva, Sekretáriu Autoridade Munisípiu Bobonaru ba Asuntu Sosiá, Júlio Carvalho Caero, no hetan partisipasaun husi estudante Eskola Sekundária no Tékniku Vokasionál no manorin sira.
Jornalista: Sergio da Cruz
Editora: Maria Auxiliadora
