OEKUSI, 29 Setembru 2025 (TATOLI) – Xefe Estadu Maior Jenerál FALINTIL-Forsa Defeza Timor-Leste (F-FDTL), Tenente Falur Rate Laek, hala’o vizita supreza ba komunidade sira iha bairru Naktuka aldeia Manán suku Bene-Ufe sub-rejiaun Nítibe Rejiaun Administrativa Espesiál Oekusi Ambeno (RAEOA).
“Ha’u mai vizita informál, tanba ita-nia komunidade sira mak husu atu mai vizita sira, entaun ha’u-nia devér no obrigasaun atu haree, ne’e afirmasaun ita-nia soberania, entaun ita-nia fronteira no rai ne’e, tanba nia mak ita luta, tanba nia mak ita mate no moris to’o ohin ita ukun rasik-aan, entaun ita tenke mai haree tanba rai ida-ne’e ita defende,” Falur Rate Laek ba jornalista sira iha Naktuka.
“Kuandu ita halo ida-ne’e, ita tenke manifesta ita-nia sentimentu nasionalizmu, maibé ita mós tenke fó omenajen ba ita-nia eroi no martir sira ne’ebé mate no lakon,” nia reforsa.
Notísia relevante:Xanana sei hasoru Prabowo aborda fronteira Naktuka tuir akordu Olanda no Portugál
Iha sorumutu ho komunidade sira iha bairru Naktuka, líder istóriku, apela, atu mantein situasaun hakmatek, kria amizade iha fronteira, no promove nafatin kultura nu’udar rai Atoni nian, entre Timor-Leste ho nasaun viziñu.
“Ita louva komunidade sira-nia hakarak kria dame iha fronteira. Sira mós uza sira-nia kultura, liuhusi adat, fatuk-lulik no ai-lulik, nune’e sira bele halo intendimentu di’ak. Ita mós agradese ba polítika sira-nia esforsa liuliu Governu, autoridade lokál sira, nasaun nia ai-riin sira, tanba esforsa no kontribui nafatin ho kooperasaun, ne’ebé ita louva ida-ne’e; agradese! Ida-ne’e mak sai hanesan ezemplu, esperiénsia ba jerasaun futuru bele halo ba mentalidade di’ak. Ita mós lori ida-ne’e hala’o nafatin ba maluk sira-ne’ebé sei iha sorin, hanoin naksalak karik, ita hatudu nafatin lia-loos no justisa ba sira,” nia apela.
Notísia relevante:Xanana husu Naktuka-oan promove dame hodi hein solusaun ba problema fronteira terestre
Entretantu komunidade iha Naktuka hamutuk uma-kain 76 ho totál populasaun hamutuk 200-resin.
Jornalista: Abílio Elo Nini
Editór: Rafael Ximenes de A. Belo
