OEKUSI, 30 Setembru 2025 (TATOLI) – Autoridade Inspesaun no Fiskalizasaun Atividade Ekonómika, Sanitária no Alimentár, Institutu Públiku (AIFAESA, I.P), tersa ne’e, halo destruisaun ba produtu liu prazu ho tipu ai-han no la’ós ai-han ne’ebé apreendidu husi estabelesimentu komersiál sira iha Rejiaun Administrativa Espesiál Oekusi Ambeno (RAEOA).
Notísia relevante:AIFAESA koordena autoridade no operadór ekonómiku atu destaka funsionáriu iha Oekusi
Atividade destruisaun ne’e, hala’o iha mota Noefefan perténsia suku Lifau sub-rejiaun Pante Makasar, ne’ebé hetan akompañamentu husi komandu Polísia Nasionál Timor-Leste (PNTL) no Autoridade RAEOA liuhusi serbisu administrasaun Oekusi.
“Destruisaun ne’e ba produtu ne’ebé ekipa destakadu halo apreensaun durante fulan tolu nian. Produtu hirak-ne’e, prende iha loja no kioste tantu iha vila no área rurál, depois asegura iha komandu PNTL Oekusi, no ohin termina ona iha trimestre datoluk ne’e, ekipa hahú halo ona sesaun destruisaun,” Koordenadór AIFAESA,I.P Ekipa Destakadu Oekusi, Mariano Fernandes, informa ba jornalista sira iha mota Noefefan, ohin.
Nia informa, produtu hirak-ne’e, maioria nesesidade bázika hanesan ai-han inklui la’ós ai-han haree liu ba produtu kosmetika sira, no produtu ai-han sira-ne’ebé apreendidu hamutuk 444, no la’ós ai-han hamutuk 21 ho produtu seluk hanesan Aquase tanba tuir teste iha laboratóriu hatudu katak, produtu referidu kontaminadu ona, entaun ekipa halo apreensaun, inklui produtu ne’ebé hakerek naran la edutiva ho kuantidade kaixa 11.
Notísia relevante:Autoridade RAEOA-AIFAESA selebra protokolu kooperasaun ho pontu importante haat
Reprezentante Diretór Diresaun Rejionál Administrasaun, Miguel Buçan, agradese tanba ho prezensa AIFAESA iha Oekusi bele halo prevensaun ba produtu liu prazu, tan ne’e nia rekomenda kontinua halo inspesaun to’o área rurál sira.
“Ita agradese ba ekipa AIFAESA tanba destakadu sira-nia ekipa iha Oekusi. Ida-ne’e importante tebes ba RAEOA, ne’ebé nu’udar reprezentante Autoridade RAEOA espera atividade inspesaun no fiskalizasaun kontinua nafatin, la’ós iha vila de’it maibé kobre mós to’o nível aldeia no suku iha área rurál, tanba ita-nia komersiánte balu ladun komprende, entaun sira kontinua fa’an sasán liu prazu ona, bele afeta ba saúde ema nian,” nia orgullu.
Notísia relevante:AIFAESA apela ba restaurante iha Oekusi kumpre rekizitu hodi garante ijiene
Entretantu, AIFAESA, I.P nafatin bolu atensaun ba operadór ekonómiku sira atu labele tenta kontra regulamentu sira ne’ebé vigór atu nune’e la prejudika operadór ekonómiku sira-nia atividade komersializasaun no kontinua garante presu justu ba konsumidór tuir lei.
Jornalista: Abílio Elo Nini
Editór: Rafael Ximenes de A. Belo
