DILI, 02 Setembru 2025 (TATOLI)—Autoridade suku sente triste relasiona ho kanselamentu projetu konstrusaun estrada diresaun Uatulari liga bá Ossoala no postu administrativu falla implementa liuhusi Fundu Klima Verde.
Xefe Suku Ossoala, Francisco Gama da Costa Lobo esplika razaun triste tanba fundu referidu sei implementa hodi konstrui estrada diresaun suku Uatulari ba Ossoala purvolta kilómetru 3,5 ho totál orsamentu hamutuk rihun $300-resin iha-ne’ebé tinan barak komunidade halerik no bainhira implementa sei rezolve problema estrada iha área referida.
“Sente triste tanba ami Ossoala laran metin ba projetu ne’e atu hadi’a estrada tanba liuhosi fundu ne’e bele hadi’a estrada no responde ona komunidade ninia halerik,” Xefe Suku Ossoala informa ba TATOLI iha Pateo, Dili, Kuarta ne’e.
Lobo relata nu’udár autoridade lokál hamutuk ho Autoridade Munisipál Baukau (AMB) halo ona esforsu hodi realiza projetu fundu verde iha Munisípiu Baukau maibé realidade hatudu prosesu burokrasia iha Governu sentrál impata implementasaun projetu referidu ne’ebé implementa husi United Nations Development Programa (UNDP-sigla ingleza).
Lobo preokupa projetu ne’e kanseladu tanba bainhira implementa sei rezolve preokupasaun no sei benefisia komunidade iha suku Osouala no Uatulari, Postu Vemasse.
“Triste tanba husi kedas fulan-Marsu atu implementa maibé dada to’o ohin loron. Tuir deadine, 15 Agustu 2025 tenke hahú ona maibé to’o ikus Governu la asina,” Lobo akresenta.
Fundu referida tuir planu tinan-ne’e sei implementa iha munisípiu neen hanesan Baukau, Lautein, Vikeke, Aileu, Ermera no Likisá ho totál projetu hamutuk 24 kompostu estrada rurál sanulu (10), irrigasaun rua (2), bee-mos sanulu (10) no drenajen no morru protensaun rua (2).
Husi projetu hirak-ne’e, aleinde konstrusaun estrada iha Ossoala, tuir planu iha Munisípiu Baukau sei implementa projetu iha Suku Baduho’o no Seisál liuhosi projetu sistema kanalizasaun bee-moos, enkuantu estrada rurál iha Suku Uatuhako.
Entretantu, Fundu Klima Verde rasik iha tinan-2024 iha orsamentu hamutuk millaun $75 ne’ebé aloka ba Timor-Leste liuhosi Autoridade Nasionál Dezignada ba Kombatente Alterasaun Klimátika (AND, I.P.).
Jornalista: Natalino Belo
Editór: Xisto Freitas da Piedade
