DILI, 03 Outubru 2025 (TATOLI)–Embaixada Indonézia iha Timor-Leste hamutuk ho Institut Pertanian Bogor (IPB) ka Universidade Agrikultura Bogor servisu hamutuk ho Governu Timor-Leste, Sesta ne’e, ofisialmente lansa programa dezenvolvimentu agrikultura integrada iha Timor-Leste hodi kombate mál nutrisaun no hasa’e seguransa alimentár.
“Foka prinsipál maka dezenvolvimentu agrikultura integrada, ne’ebé atu hametin seguransa ai-han, hasa’e abilidade agrikultór sira-nian no fó benefísiu direta ba komunidade,” Embaixadór Indonézia, Okto Dorinus dehan ba jornalista sira, iha Embaixada Indonézia, Faról, Dili, Sesta ne’e.
Embaixadór ne’e haktuir programa ne’e hanesan kolaborasaun husi parte rua ne’ebé finaliza ona partisipa formasaun iha Bogor, Indonézia.
Iha fatin hanesan, Reprezentante Univeridade IPB Bogor Indonézia, Ichsan Achmad Fauzi esplika ikan la’ós de’it fonte ai-han, maibé mós estratéjia ida oinsá atu hadi’a komunidade nia nutrisaun.
“Programa ne’e hein atu kria valór ekonómiku, habelar oportunidade negósia no hadi’a padraun moris komunidade nian, liuliu iha área rurál sira,” nia hateten.
Nune’e mos, Sekretáriu Estadu Peska, Domingos da Conceição dos Santos hato’o apresiasaun ba Governu Indonézia no IPB ne’ebé fó apoiu ba haki’ak ikan sira iha Aileu.
“Programa ne’e sai hanesan modelu pilotu ida-ne’ebé ita bele dezenvolve iha área sira seluk hanesan Likisá, Same, Lautein no Bobonaru, tanba ne’e ami hein katak partisipante sira-ne’ebé estuda iha Indonézia bele sai formadór ba komunidade sira seluk iha Timor-Leste, nune’e programa nia benefísiu bele habelar ba komunidade tomak,” nia subliña.
Programa referidu nia durasaun tinan tolu, kompostu husi programa konstrusaun kolam, haki’ak ikan tilapia, jestaun produsaun, marketing, finansa, saúde ikan, formulasaun ai-han ikan no pratika alimentasaun naturál, produsaun, produsaun no nutrisaun ikan ho nia valór.
Formasaun ne’e hetan apoiu husi LDKPI/Indonesia Aid, IPB, Embaixada Indonézia, Governu Timor-Leste, autoridade lokál sira no komunidade.
Entretantu, programa ne’e sai hanesan pasu estratéjiku ida hodi hametin seguransa ai-han, hadi’a nutrisaun no loke oportunidade ekonómika foun liuhosi dezenvolvimentu agrikultura ne’ebé sustentavel.
Jornalista: Osória Marques
Editór: Xisto Freitas da Piedade
