DILI, 03 Outubru 2025 (TATOLI)—Diretór Servisu Saúde Munisípiu Ermera, António de Jesus, rekoñese familia pasiente kontaktu karreta ambulansia atu tula vitima inséndiu ne’ebé akontese iha 26 Setembru 3025 iha suku Haupu, Postu Administrativu Letefoho, Munisípiu Ermer ba Dili maibé ambulánsia laiha tanba ambulánsia multifunsaun ho kondisaun ne’ebé mak aat.
Notísia Relevante: Família inséndiu iha Ermera preokupa transporta pesiente mai Dili ho karreta privadu
“Loos duni, momentu ne’ebá multifunsaun ho kondisaun ne’ebé mak aat hela, depois Sentru Saúde Letefoho koko telefone ba SSK Atsabe, maibé kareta ba foti hela moras seluk entaunn demora, nune’e mós ambulansia husi Gleno lori hela moras ba Dili. Tanba ne’e mak la konsege to’o lalais atu salva pasiente refere, entaun familia pasiente koko atu transporta ho sira-nia transporte privadu,” António de Jesus hateten ba jornalista sira iha INSP-TL, Komoro, ohin.
Responsavel ne’e hato’o agradesementu ba família pasiente insendiu ne’ebé koko atu tulun kazu ida-ne’e tanba kazu ne’e fó perigu ba ema-nia vida.
Nia dehan, t Servisu Saúde Munisípiu Ermera la’os la tau importánsia ka la tau prioridade maibé tanba limitasaun transporte sira, distánsia no estrada aat, ne’e mós bele prejudika atu sira halo atendementu ne’ebé mak emerjénsia ho urjente ba komunidade.
Nia informa, iha planu husi Autoridade Munisípal no Servisu Saúde Munisípiu hatama planu no deskute ona iha komisaun revizaun Orsamentu ba tinan 2026 nian atu haree mós asuntu sira-ne’e.
“Maibé to’o agora ita seidauk hatene katak aprova ka lae. Enprisipiu, ita tau iha planu katak Servisu Saúde Munisípiu Ermera hakarak atu hola tan ambulánsia tolu, liuhusi autoridade atu nune’e bele distribui ba Sentru Saúde Letefoho rasik ida, Hatulia ida ho Gisarudu ida. Ne’e ita-nia esperansa katak karik iha KRO aprova ita bele halo distribuisaun ba sira,” nia informa.
Antonio afirma, Sentru Saúde balun iha Munisípiu Ermera iha de’it ambulansia ida-idak tanba ne’e no sentru saúde balun iha rua no multifunsaun 10 maibé kondisaun ladún di’ak ona.
“Dadaun ne’e ami ambulansia hanesan Railaku mak iha Ambulansia rua, Atasabe iha ambulánsia rua, Ermera vila iha ambulánsia rua, no restu iha ida-idak de’it. Maibé kona-ba multifunsaun ami iha hamutuk 10. Ita-boot sira hatene katak kareta ne’e ita uza tinan naruk ona, entaun nia kondisaun ne’e ladún di’ak. Dalaruma kada tinan ne’e sempre aat hela de’itno ita hadi’a hela de’it. Tanba ne’e mós dalaruma karreta tuan demais ona, ita labele halo atendementu ho lalais tanba kondisaun aat hela,” nia dehan.
Jornalista : Felicidade Ximenes
Editór : Cancio Ximenes
