DILI, 06 Outubru 2025 (TATOLI)—Diretór Klíniku Ospitál Nasionál Guido Valadares (HNGV, sigla portugés), Arcanjo Nunes, hateten husi tinan kotuk to’o agora timoroan hamutuk na’in-18 mak mate tanba moras Raiva.
Notísia Relevante: Ministériu Saúde rejista ona pasiente mate tanba raiva hamutuk 17
“Durante ne’e ita rejista ona pasiente sira-ne’ebé mak lakon vida tanba moras Raiva hamutuk na’in-18, ida-ne’e husi tinan kotuk to’o agora. Sira-ne’e asu tata iha munisípiu sira mak transfere mai halo tratamentu iha HNGV ikus la salva sira nia vida,” Arcanjo Nunes hateten ba jornalista sira iha HNGV Dili, segunda ne’e.
Nia haktuir, pasiente na’in-18 ne’ebé lakon ona vida kompostu husi mane na’in-hitu (7), feto na’in-11 no husi númeru ne’e na’in-haat (4) halo tratamentu duni iha HNGV no husu alta ba uma mak hakotu iis.
“Pasiente sira-ne’e transfere husi muníspiu mak mai. Sira ne’e mai ho sintoma pozitivu ba Raiva, sira mai baixa iha HNGV la-to’o semana, sira mate ona,” nia dehan.
Nia dehan, solusaun atu kura moras Raiva liuhusi dalan úniku mak bainhira asu tata tenke hakbesik-aan ba Sentru Saúde hodi simu vasina atu prevene moras referida.
Antes ne’e, Vise-Ministru ba Fortalesimentu Institusionál Saúde, José Magno husu populasaun sira tenke vasina asu hodi prevene moras Raiva tanba daudaun ne’e moras Raiva sa’e maka’as iha Timor-Leste.
“Husu ba populasuan hotu-hotu asu ne’ebé seidauk hetan vasinasaun Raiva tenke lori ba vasina tanba kazu Raiva iha Munisípiu nafatin sa’e. Tenke lori asu sira ba vasina, vasina ne’ebé prepara gratuita,” José Magno hateten.
Nune’e, Governante ne’e husu ba populasaun sira tenke kontribui lori asu ne’ebé haki’ak iha uma ba Sentru Saúde sira hodi simu vasina atu bele prevene moras Raiva.
Jornalista : Felicidade Ximenes
Editór : Cancio Ximenes
