Seagull Resort ne’ebé prátika jogu online la rejista iha SERVE
DILI, 06 Outubru 2025 (TATOLI) – Servisu Rejistu no Verifikasaun Emprezariál, Institutu Públiku (SERVE, I.P) konsidera jogu ne’ebé hala’o husi empreza internasionál Seagull Resort, iha Rejiaun Administrativa Espesiál Okusi Ambenu (RAEOA), ne’e ilegál tanba la rejista iha SERVE.
Diretór Ezekutivu, SERVE, I.P, Fausto Soares Dias, hateten empreza Seagull Resort ne’ebé prátika jogu online iha RAEOA ne’e ilegál tuir Lei Sosiedade Komersiál no Dekletu-Lei Rejistu Komersiál.
Tuir dadus ne’ebé SERVE asesu, iha tinan 2014, iha duni empreza internasionál ida ho naran Seagull International Unipessoal Lda halo rejistu hodi hala’o atividade komersiál no hetan legalidade ka personalidade jurídika tuir Lei 10/2017 no Dekretu-Lei 16/2017 ho nia atividade komersiál mak loke alfaiate, hatama ekipamentu elektróniku, no fa’an hena (texstile), maibé la rejistu ho empreza naran Seagull Resort.
“Tanba ne’e, SERVE atu deklara ba públiku katak empreza ne’ebé halo atividade jogu online iha Oekusi ho naran Seagull Resort ami konsidera ilegál no la envolve iha atividade referida, tanba SERVE la rekoñese no empreza ne’e nia la mai rejistu iha SERVE hahú husi sukursál RAEOA to’o mai Dili”, Fausto Soares Dias afirma ohin.
Tanba ne’e, SERVE husu ba parte kompetente halo investigasaun profunda kona-ba aktu ne’ebé komete husi empreza referida.
Iha fatin hanesan, Supervizór SERVE, I.P, Raul Sanches, hateten Seagull Resort tuir lei katak nia ilegál no seidauk hetan rejistu iha SERVE hodi hetan personalidade jurídika.
Tuir nia, iha duni empreza Seagull International, tanb rejistu iha SERVE iha loron 24 Jullu 2014, maibé ho atividade ne’ebé diferente ho Seagull Resort agora ne’e. “Seagull Internationál ne’e mós la’ós ema xineza, maibé indianu ida, nune’e empreza rua ne’e diferente no Seagull Resort ilegál tanba la rejistu iha SERVE”, reitera.
Iha biban ne’e mós estrtutura SERVE deklara ba públiku relasiona ho informasaun ne’ebé ID falta ida ho naran Detekta lansa iha mídia sosiál kona-ba atividade sira ne’ebé mak liga ho jogu online katak Diretór Ezekutivu SERVE mós envolve no atribui lisensiamentu jogu, inklui informasaun katak Diretór Ezekutivu SERVE daudaun detidu ne’e laloos.
“Aproveita tempu ida-ne’e ha’u atu halo klarifikasaun ba públiku katak ID falsa Detekta divulga informasaun bosok, tanba realidade ha’u la hetan detidu no ativu hela serbisu iha ha’u-nia knaar fatin SERVE to’o agora”, realsa.
Lembra katak, iha 26 Agostu 2025, Polísia Sientífika Investigasaun Kriminál (PCIC, sigla portugés) hamutuk ho Servisu Nasionál Intelejénsia (SNI) hala’o vizita supreza ida hodi halo buska, apreensaun no dezentela ba jogu online ilegál rua hanesan esplorasaun jogu ilísitu online, burla informátika, rede scam call center transnasionál, ne’ebé instala husi empreza internasionál Seagull Resort husi Malázia iha otél Oé-Upun, RAEOA.
Tribunál Judisiál Primeira Instánsia Oekusi, liuhusi Juis Singulár, Evangelino Belo, hasai despaxu hodi aplika medida koasaun prizaun preventiva ba arguidu na’in-neen, tanba komete jogu online ilegál rua, ba esplorasaun jogu ilísita kriminoza jogu online no burla informátika, ne’ebé instala husi Seagull.
Arguidu na’in-neen ne’e ho inisiál AS no RN husi Indonézia, LQ, AWX no YLXX husi Xina no N.M husi Nepál.
Prosesu Primeiru Interrogatóriu ne’e, Ministériu Públiku, reprezenta husi Prokuradór Mateus Nessi, promove arguidu sira ho krime esplorasaun jogu online ilísitu burla informátika no burla agravadu, ne’ebé previstu iha artigu 322, 268 no 269 Kódigu Penál Timor-Leste.
Notísia relevante: PM Xanana husu PCIC kontrola jogu ilísitu no online scam
Jornalista: Arminda Fonseca
Editora: Maria Auxiliadora
