OEKUSI, 08 Outubru 2025 (TATOLI) – Autoridade Rejiaun Administrativa Espesiál Oekusi Ambeno (RAEOA) liuhusi Diresaun Rejionál Agrikultura, kuarta ne’e, hatuur fatuk dahuluk hodi halo reabilitasaun ba kanál irrigasaun atu fasilita bee ba natar ektare 25 envolve natar na’in-45 iha natar Masin-Ki’ik suku Lalisuk sub-rejiaun Pante Makasar.
Notísia relevante:Autoridade Lalisuk husu konstrui irigasaun haat hodi hasa’e produsaun
Diretór Diresaun Rejionál Agrikultura, José Oki, informa, projetu ne’e sei apoia agrikultór sira hodi halo jestaun bee ho di’ak, nune’e kada tinan natar-na’in sira bele halai natar dalarua.
“Ohin lansa ona, ha’u ko’alia ona Diretór kompañia, atu aselera serbisu, presiza aumenta bada’en atu halais serbisu, tanba Novembru udan ona, entaun bee bele tama ona, atu fasilita agrikultór halai natar, tanba tama ona fulan-Dezembru ne’e tempu pagamentu nian husi orsamentu 2025, tanba orsamentu 2025 sei taka ona 15 Dezembru,” nia dehan iha natar Masin-Ki’ik suku Lalisuk.
Presiza kooperasaun
Iha biban ne’e, Dirijente Agrikultura ne’e, rekomenda ba kompañia atu tau importante ba kualidade obra, nune’e sai parseiru nafatin iha futuru, tanba ne’e nia fó hanoin mós ba ekipa jestaun bee iha natar Masin-Ki’ik, bainhira obra ne’e konkluídu, presiza kooperasaun hodi halo jestaun bee to’o ema hotu.
“Ha’u espera imi (agrikultór) sira hamutuk kria kooperasaun di’ak, atu jere bee ne’e ho didi’ak, karik bele tinan ida imi bele halai dalarua,” nia fó hanoin.
Iha biban ne’e, natar na’in- Agostu Kofi, konsidera projetu ne’e importante tanba durante ne’e, irigasaun sempre difikulta sira hodi kanaliza bee ho di’ak.
“Ami agradese ba Governu, tanba ami hein tinan barak, ohin bele rezolve ona ami-nia preokupasaun ne’e. Ami promete katak sei halo jestaun di’ak, tanba ami iha ona esperiénsia durante ne’e ami koopera malu di’ak entre agrikultór sira iha natar Masin-Ki’ik,” nia orgullu.
Notísia relevante:Konstrusaun irrigasaun metru-100 iha suku Lalisuk gasta rihun $26
Entretantu, projetu reabilitasaun irigasaun referida nia distánsia naruk metru 190, implementa husi empreza lokál Jutabanliu Unipesoál Lda ho nia valór kontratu $20,777.63 ho durasaun serbisu fulan rua.
Jornalista: Abílio Elo Nini
Editór: Rafael Ximenes de A. Belo
