KOVALIMA,08 Outubru 2025 (TATOLI) –Festivál Fronteira 2025 ne’ebé maka organiza husi Ministériu Juventude Desportu Arte no Kultura (MJDAK) no Sentru Nasionál Chega (CNC-sigla portugués), iha Kovalima, kuarta ne’e, hahú ho serimónia rituál kultura ho objetivu atu husu matak malirin hodi fó susesu ba eventu nasionál ne’e.
Serimónia rituál kultura ne’e, lidera hosi lia-na’in suku Kamenasa, postu administrativu Suai, munisípiu Kovalima ne’ebé maka reprezenta lia-na’in hosi munisípiu sira fronteira hanesan Bobonaro no RAEOA inklui nasaun viziñu Nusa TenggaraTimur (NTT) Indonézia.
Notísia Relevante :MJDAK aprezenta modalidade desportiva neen harame festivál fronteira 2025 iha Kovalima
Antes atu hahú serimónia ritual ne’e, lia-na’in sira nahe biti, rai bua no malus, ahu iha koba ne’ebé reprezenta munisípiu Bobonaro, RAEOA no NTT, depois kontinua ho oho animál hanesan fahi hodi hisik fahi-nia ran ba iha koba ne’ebé maka tau ona bua no malus ho sintidu ida matak simu malirin nune’e bele kria unidade nasionál nomos hametin amizade ho nasaun viziñu Indonézia iha futuru.
“Ita hahú halo serimónia kultura ami husi Kovalima konvida munisípiu hotu inklui ho nasaun viziñu Indonézia hodi partisipa eventu festivál fronteira iha unidade ibun ida lian ida nune’e labele atu buat ne’ebé la di’ak,”Lia-nain Suku Camanasa, Anacleto Amaral Bei-rai Ulun, esplika ba jornaista sira iha kampu Ladi.
Iha sorin seluk, Prezidente Komisaun Organizadora eventu Festivál Fronteira 2025 iha Kovalima, Miguel Armanda Cardoso, informa serimónia rituál kultura ne’e tuir lisan husi munisípiu Kovalima.
“Intensaun ita hala’o serimónia kultura atu hetan matak malirin husi lia-na’in husi munisípiu 13 inklui husi postu hitu ne’ebé maka pertense ba munisípiu Kovalima.iha Kovalima ita bolu kaletek taruik no mós saletek salada,”nia dehan.
Entertantu, Festivál Fronteira 2025 sei realiza iha loron 09 to’o 11 fulan-Outubru 2025 iha munisípiu Kovalima.
Notísia Relevante :Bobonaru lori atleta husi modalidade haat kompete iha festivál fronteira Kovalima
Jornalista:Celestina Teles
Editór : Florencio Miranda Ximenes
