DILI, 08 Outubru 2025 (TATOLI)-Komisaun G iha Parlamentu Nasionál, ne’ebé trata asuntu Edukasaun, Juventude, Kultura no Sidadania, solisita ba Ministériu Negósiu Estranjeiru no Kooperasaun (MNEK) atu ko’alia ho Governu indonéziu kona-ba estensaun vistu ba estudante timoroan sira iha Indonézia.
Tanba vizita traballu ne’ebé Komisaun halo foin lalais ne’e iha Indonézia hodi haree kondisaun atuál, timoroan ne’ebé daudaun hala’o estudu iha Jakarta, Solo, Jogja, Surabaya, no Malang, nesesita duni atu hetan atensaun.
Prezidente Komisaun G, Armando Lopes, hateten estudante sira hato’o preokupasaun kona-ba prosesu estensaun vistu estudante (KITAS) no durasaun lisensa atu hela legál iha Indonézia, tanba kada tinan sempre halo estensaun vistu no durasaun lisensa atu hela.
“Ami ko’alia daudaun hodi hato’o ba Governu indonéziu, liuhusi ita-nia embaixada no Ministériu Ensinu Superiór, Siénsia no Kultura (MESSK) no kanaliza ona ba Ministériu Negósiu Estranjeiru no Kooperasaun atu halo enkontru ida ho Indonézia. [Atu] lisensiatura halo visa no KITAS ba tinan haat, mestradu rua, no doutoramentu tolu”, nia hato’o hafoin reuniaun Komisaun hodi aprova relatóriu vizita ne’e iha Parlamentu, ohin.
Tuir dadus Komisaun nian, timoroan rihun 5-resin mak daudaun hala’o estudu iha Indonézia, iha universidade oioin, maibé maioria bá privadu no balun hetan bolsa estudu husi Governu Timor-Leste no Indonézia rasik.
“Sira mós hato’o preokupasaun kona-ba lia-indonézia, bainhira inisia aula, nune’e iha relatóriu rekomenda ba sentru formasaun Pusat Budaya Indonézia iha Dili atu konsidera hodi fó formasaun molok bá hala’o estudu”, dehan.
Ba kestaun ne’e, Komisaun ko’alia ona ho MESSK oinsá halo diskusaun ho Embaixadór Indonézia hodi haree kestaun referida.
Aleinde, estudante sira aprezenta preokupasaun seluk iha tempu eleisaun jerál presiza tau sentru votasaun iha kada provínsia iha Indonézia hodi sira bele ezerse direitu votu.
Lembra katak, iha 05 Marsu 2025, Ministru Ensinu Superiór, Siénsia no Kultura, José Honório, ho nia omólogu indonéziu, Brian Yuliarto, ko’alia ona kona-ba kestaun vistu ba estudante timoroan.
Iha sorumutu ne’e aborda atu fasilita estudante timoroan sira hetan vistu estudante, nune’e mós estensaun durasaun vistu estudante nian (lisensa atu hela ba estudante timoroan sira iha Indonézia). Purezemplu, durasaun vistu estudante ba estudante lisensiatura nian bele fó tinan haat duke tinan ida, no mestradu nian tinan rua no doutoramentu tolu.
Notísia relevante: Komisaun G levanta preokupasaun estudante timoroan iha Indonézia kona-ba vistu
Jornalista: Nelson de Sousa
Editora: Maria Auxiliadora
