DILI, 08 Outubru 2025 (TATOLI)—Ministra Saúde (MS), Elia dos Reis Amaral, hateten Konsellu Ministru kuarta ne’e, iha Palásiu Governu Dili diskute no aprova rezolusaun Governu kona-ba vaga promosaun ba profisionál saúde hamutuk 2.016.
Notísia Relevante: KM aprova rezolusaun kona-ba promosaun ba profisionál saúde sira
“Ami finaliza ona no termina katak presiza atu halo tan rezolusaun Governu ida lori mai Konsellu Ministru kona-ba fiksasaun ba vaga. Entaun vaga sira-ne’ebé mak ita aprezenta no profisionál saúde hamutuk 2.016 mak sei sai promovidu, atu hasa’e sira-nia eskalaun no grau,” Ministra Elia hatetem ba jornalista sira, ohin.
Rezolusaun Governu nian ne’ebé aprova tuir Dekretu-Lei númeru. 31/2025, 24 Setembru, define númeru husi vaga ba promosaun profisionál sira iha karreira médika, enfermajen, parteira profisionál no tékniku diagnóstiku, terapéutika no saúde públika, iha ámbitu rejime espesiál funsaun públika nian.
Medida ida-ne’e kumpre kompromisu Governu nian atu valoriza profisionál saúde sira no asegura rekoñesementu ba sira-nia méritu no durasaun servisu nian, hodi promove motivasaun, retensaun no estabilidade husi kuadru sira-ne’e, ne’ebé kualifikadu tebes iha Servisu Nasionál Saúde nian.
Iha totál, estabelese ona vaga promosaun hamutuk 2.016, ne’ebé fahe entre karreira diferensa hanesan karreira Médika ho vaga 376, karreira Enfermajen ho vaga 985, karreira Parteira Profisionál ho vaga 293 no karreira Tékniku Diagnóstiku, Terapéutika no Saúde Públika ho vaga 362.
Antes ne’e, Diretór Jerál ba Kooperasaun Planeamentu no Dezenvolvimentu Polítika iha MS, Narciso Fernandes, informa hahú husi Setembru to’o Dezembru 2025 ne’e, Ministériu Saúde sei selu profisionál saúde hamutuk 2.016 ne’ebé antes ne’e hetan ona promosaun karreira.
Nia hatutan, pagamentu ne’e bazeia ba avaliasaun dezempeñu servisu no orsamentu atu selu profisionál saúde hirak ne’e, Minsitériu Saúde prevee ona iha Orsamentu Jerál Estadu (OJE) 2025 hamutuk millaun $1.9.
“Ita selu iha tinan ida-ne’e tanba orsamentu alokadu ona no pagamentu sei hahú iha Setembru to’o Dezmebru, inklui ho saláriu désimu terseiru,” Narciso Fernandes hateten.
Husi profisionál saúde 2.016 ne’e, nia dehan, Ministériu saúde sei enkuadra hahú husi fulan-Setembru to’o Dezembru, no ida-ne’e mós inklui ona ho saláriu désimu terseiru ba hirak ne’ebé mak nia naran tama lista enkuadramentu.
Nia informa, ba kandidatu ne’ebé mak elijivel ne’e hamutuk 3.000-resin maibé ba vaga ne’ebé prevista husi promosaun karreira mak hamutuk 2.016 no husi ne’e fahe ba kategoria oioin ba profisionál saúde mak hanesan médiku, parteira, enfermeiru no tékniku aliadu.
Jornalista : Felicidade Ximenes
Editór : Cancio Ximenes
