BOBONARU, 10 Outubru 2025 (TATOLI) –Koordenadór Gabinete Apoia Sosiedade Sívil (GASC, sigla portugés) IX Governu, Joaquim da Costa Freitas hamutuk ho Bispu Dioseze Maliana, Don Norberto do Amaral, sesta ne’e, halo inaugurasaun ba Kapela Nossa Senhora das Dores Korluli, suku Ritabou, Postu Administrativu Maliana,Munisípiu Bobonaru ne’ebé konstrui husi sarani sira no apoia finanseiru husi governu.
Iha omília, Don Norberto do Amaral, kongratula sarani Korluli tomak ne’ebé ho inisiativa rasik harii ona kapela ne’e.
Líder Dioseze Maliana ne’e konsidera, obra ne’e nudar faktus ida katak apoia husi governu ne’e sai duni realidade no fiar katak ho kapela foun ne’e bele hametin liután sarani sira-nia fiar hodi bele moris iha pás nia-laran.
“Ohin ita fó bensaun ba kapela Korluli. Kapela ida di’ak, bonita no luan. Ha’u hanoin kapela hothotu ida ne’e mak di’ak liu karik?! Maibé, la’ós uma ida-ne’e mak importante,ida. Importante liu mak ema ida-ne’ebé iha uma ida ne’e nia laran. Sarani moris loloos no fiar. Ita sai duni Maromak nia bibi-ain,no sai saseluk ida-ne’ebé bonita iha ema nia oin,atu nune’e kepela ida-ne’e fó espiritu mai ita – espiritu unidade, iha komprensaun ba malu, solidariedade fó liman ba malu hodi harii uma-kreda ida-ne’e. Nune’e, ohin loron ita bele fó bensaun ho kontente,” Dom Norberto haklaken.
Koordenadór GASC, Joaquim da Costa Freitas, reforsa, obra ne’e nu’udar rezultadu ida husi prosesu tomak ne’ebé maka koperasaun tinan naruk entre Koferénsia Episkopál Timorense (CET, sigla portugés) ho Governu.
Reprezenta Governu, Joaquim da Costa Freitas husu ba sarani sira atu hala’o didi’ak atividade fiar nian iha uma-kreda ne’e.
“Reprezenta governu, ami senti kontente tanba fizikamente bele haree rezultadu ida-ne’e eziste iha fatin ida-ne’e. Ami mós apresia kooperasaun tinan naruk nia laran no mós rezultadu ne’ebé ita atinje mai to’o ohin loron,tanba ne’e ami husu kapela ida-ne’e halo tiha, labele abandona. Ami mós husu ba sarani sira iha ne’e atu kontinua tau-matan no halo kontribuisaun hodi halo manutensaun ba uma ne’e karik sasan ruma aat,” nia afirma.
Paroku Igreja Pro-Katedrál Santa-Krus Maliana, Pé. Valerio Gusmão, subliña, Dioseze Maliana aloka orsamentu hodi harii kapela ho nia espasu luan ne’e hanesan preparasaun ba tinan naruk nian.
“Babain mai misa iha ne’e,sira dehan uma deit lima ou neen deit, mas halo los Kepala bo’ot ba sira ne’e, ha’u hanoin ita hanoin la’ós tinan ida agora. Ita halo kapela hanoin ba tinan-20 ou 30 mai nian tanba labarik sira agora ne’e barak. Tinan-20 mai ne’e kepela ne’e justru la to’o fila fali ona tanba ema barak,” nia dehan.
Sekretáriu Komisaun Organizadora ba konstrusaun Kapela Korluli, Manuel Alfredo, sarani sira organiza malu konstrui kapela ne’e durante tinan haat nia laran hahú kedas iha 2021 no foin finaliza iha tinan ne’e.
“Kapela ida agora ita iha laran ne’e, antes Kapela tuan Bebak aat dodok ida iha oin ne’ebá, maibé agora ita iha Kapela di’ak no luan, ne’e monentu ne’ebá ami tuur hamutuk fó ideia ba malu, tuur hamutuk halibur osan husi sarani Korluli ho osan naton,” nia haktuir.
Kapela ne’e konstrui kompletu ho mobiliariu no lutu-hale’u gasta orsamentu hamutuk rihun $59,333 no montante ne’e mai husi sarani sira, Parókia Maliana, entidade relevante sira, apoia husi Gabinete Apoia Sosiedade Sívil liuhusi Dioseze Maliana hamutuk rihun $42,430.
Enkuantu iha selebrasaaun misa ne’e Dom Norberto mós fó Sakramentu Krizma ba Krizmadu 380 no misa ne’e partisipa husi Antigu Prezidente Parlamentu Nasionál atuál Deputadu Bankada Fretilin, Aniceto Guterres Lopes, Prezidente Komisaun F, Maria Gorumali Barreto no deputadu sira seluk, Komandante Polisía Munisípiu Bobonaru, Superintendenti Xefi Agustino Gomes da Silva no hetan partisipasaun masimu husi sarani sira.
Notisía relevante: https://tatoli.tl/2025/06/26/pm-xanana-don-norberto-observa-rai-atu-harii-igreja-katedral-maliana/
Jornalista:Sergio da Cruz
Editór: Rafael Ximenes de A. Belo
