VIKEKE, 12 Outubru 2025 (TATOLI)–Aplikante sira ba vaga Polísia Nasionál Timor-Leste (PNTL) hamutuk na’in-766 husi Vikeke, Domingu ne’e, partisipa iha ezame kulturál no na’in-ualu mak la partisipa iha ezame.
“Ohin ha’u mai hodi observa prosesu ezame kulturál ne’ebé ita-nia fiskalizadór sira haree no pontu-vogál sira-ne’ebé fó ezame kulturál ba ita-nia alin aplikante sira. Iha Munisípiu Vikeke, aplikante hamutuk 774. Husi númeru ne’e, ami deteta kandidatu hamutuk na’in-ualu mak la partisipa ezame kulturál tanba la pasa iha dokumentu balun, idade tinan 24 liu no idade la to’o. Balun dokumentu diploma sekundária laiha. Tan ne’e, sira labele partisipa ezame kulturál no daudaun ne’e kandidatu hamutuk na’in-766 de’it mak tuir hela ezame kulturál ne’ebé realiza iha Vikeke,” Pontu-vogál husi Komisaun Rekrutamentu ajente PNTL, atuál Superintendente Xefe, Justino Menezes ba jornalista sira, hafoin ramata abertura ezame kulturál, iha Eskola Sekundária 04 Setembru, Vikeke.
Justino haktuir preparasaun ba ezame kulturál hala’o iha tuku 7h00 Otl, aplikante no fiskalizadór sira iha ona fatin ezame hodi fó koñesimentu ba kandidatu sira hafoin tama sala laran hodi prenxe formatu sira.
“Ha’u haree ezame kulturál iha Munisípiu Vikeke la’o ho di’ak inklui preparasaun ba fatin ezame di’ak. Depoizde ezame ne’e hotu, ami sei rekolla pontu ezame sira para aban lori bá Komisaun Sekretária Nasionál hodi kontinua haree rezultadu ezame nian,” nia dehan.
Justino enkoraja kandidatu sira tenke fiar aan no fuan metin hodi partisipa ezame kulturál.
“Ha’u espera katak iha Munisípiu Vikeke kandidatu sira bele pasa barak iha ezame kulturál hodi kontinua bá prosesu seluk hanesan teste fízika, psikolojia, entrevista no teste médika,” nia hato’o.
Tuir observasaun jornalista TATOLI, ezame kulturál ne’e realiza iha eskola rua hanesan Ensinu Báziku Sentral (EBC-sigla portugeza) 01 Vikeke Vila okupa sala ualu (8) no Sekundáriu 04 Setembru Vikeke Vila sala 12.
Aplikante sira asesu ba sala laran bazeia ba númeru kada kandidatu idak-idak nian no komisaun rekrutamentu orienta aplikante sira rai telemovel iha li’ur no aprezenta kartaun idade hanesan kartaun eleitorál, Billete Identidade (BI) no kartaun aplikante.
Iha ezame ne’e, hetan vijilánsia husi membru PNTL Munisípiu Vikeke no Komisaun Rekrutamentu PNTL ba tinan 2025. Ezame ne’e hahú tuku 10h00 to’o tuku 12:30.
Jornalista: Vitorino Lopez da Coste
Editór: Xisto Freitas da Piedade
