DILI, 13 Outubru 2025 (TATOLI)–Ministru Asuntu Kombatente Libertasaun Nasionál (MAKLN), Gil da Costa Monteiro “Oan Soru”, informa ekipa Konsellu Kombatente Libertasaun Nasionál (CCLN-sigla portugeza) ho estudante rezisténsia hahú ona halo verifikasaun ba lista reklamasaun no kontestasaun 2009 no dadus pendente 2003 nian iha kada munisípiu.
“Ohin ekipa CCLN ho estrutura rezisténsia hahú halo servisu iha kada munisípiu ligadu ho reklamasaun no kontestasaun kombatente rejistadu 2009,” Oan-Soru dehan ba TATOLI, iha Bidau-Lesidere, Segunda ne’e.
Oan-Soru dehan ekipa CCLN ho estrutura sira rezisténsia nian ne’ebé atu deside ne’e, kompostu hosi ema na’in-ualu. Ekipa sira tun bá ne’e atu deside dehan A ka B. Bele ka labele. Totál dadus reklamasaun no kontestasaun hamutuk 61.7111.
“Maioria reklamante no kontestante sira husu de’it, laiha justifikasaun, la fundamentu sira-nia razaun tanba saida mak hakarak hasa’e bá 8a14, 15a19 ka 20a24. Hosi númeru ne’e, iha dadus reklamadu rihun 58-resin mak ema husu atu hadi’a sira-nia dadus hosi 3a7 sa’e bá 8a14 no balun husu atu hasa’e bá 15a19. Enkuantu, dadus kontestadu hamutuk rihun 3-resin mak ema kontesta malu atu elimina hosi sistema, tanba deskonfia uluk koolabora ho inimigu hodi kontra ukun-rasik aan,” Oan-Soru haktuir.
Kona-ba reklamasaun no kontestasaun, nia esplika, kontestasaun katak ema ida kontesta hasoru ema seluk, tanba uluk koolabora tiha ho inimigu hodi kontra ukun-rasik aan. Ema ne’e uluk hamutuk ho inimigu hodi tiru mate tiha komandante FALINTIL balun iha ai-laran. Tanba ne’e husu atu elimina ninia naran lista veteranu.
Reklamasaun katak ema ida mai reklama ba CCLN katak nia la merese hetan 8a14, loloos ne’e nia tenke hetan 15a19. Ema ne’e reklama atu hadi’a nia dadus hodi hasa’e nia eskluzividade ka grau partisipasaun luta nian.
Hosi totál reklamasaun no kontestasaun ne’e na’in-21.000-resin mak tama ona ba lista pagamentu iha Dezembru tinan ne’e.
Jornalista: Osória Marques
Editór: Xisto Freitas da Piedade
