DILI, 14 Outubru 2025 (TATOLI) – Vise-Ministru ba asuntu Parlamentár, Adérito Hugo, hateten Governu seidauk bele halo pronunsiamentu ba Kazu Ró Haksolok, tanba iha ona prosesu justisa.
Nia dehan, Nonu Governu nia entrada ho Primeiru-Ministru nia diskursu hanesan mós deputadu sira temi ba asuntu akizasaun ba ró ne’e sai ona problema nasionál diskusaun tinan barak nia laran iha públiku no mós Parlamentu.
Tanba desizaun halo kontrusaun ba ró no autoridade kompetente ba iha ezekusaun mak Rejiaun Administrativa Espesiál Oekusi Ambeno (RAEOA).
“Maibé, ohin ne’e debate mosu, tanba komisaun C (Finansa Públika) iha oportunidade durante resesu halo fiskalizasaun vizita direta ba iha terrenu estraleiru kompañia Atlantic Eagle hodi haree detallu. Tuir relatóriu Komisaun ba haree falta millaun $8.5”, Reprezentante Governu nian hato’o iha Parlamentu, ohin.
Hodi dehan, maibé iha komplesidade tomak hosi orsamentu alokadu ona ba Ró Haksolok nia konstrusaun, tanba hala’o tiha lansamentu ba operasionalizasaun iha tinan 2017.
Maibé pontu importante ba públiku ne’e mak tansa mak ró ne’e seidauk hotu.
“Maibé, ohin intervensaun mós hanesan Autoridade RAEOA halo tan akizisaun partisipasaun ba kompañia Atlantic Eagle ba nia asset (sahan) hanesan asionista ho maioria ninia partisipasaun 95%,” nia salienta.
Governante ne’e, realsa iha pontu ne’e Governu haree katak tanba prosesu ne’e tama ona iha justisa nian. No husi relatóriu Komisaun hanesan informasaun adisionál bele haree pontu situasaun tuir perspetiva Komisaun vizita iha terenu no dokumentu ne’ebé iha.
“Maibé, prosesu legál la’o hela, tan ne’e mak Governu lakohi fó pronunsiamentu ruma ba situasaun ne’e, husik ba prosesu ne’e iha ona justisa, ita lalika julga malu no justisa sei lori klareza, tanba osan tau planu iha liuhosi RAEOA atu hola ró, faktu iha ona, maibé tansá mak la mai,” nia argumenta.
Vise-Ministru hein parte justisa bele tau atensaun no aselera prosesu atu povu hotu hela ho serteza.
Entretantu iha reuniaun plenária Parlamentu ohin Komisaun C hala’o aprezentasaun relatóriu vizita no estudu komparativu iha Portugál bá Ró Haksolok.
Antes ne’e, Prezidente Komisaun C, Cedelízia Farria dos Santos, hateten relatóriu fiskalizasaun ne’e identifika irregularidade barak, tanba empreza husu atu transfere tan millaun $8,5 hodi bele konklui konstrusaun Ró Haksolok.
Nune’e rekomenda ba Governu atu labele aloka tan ona orsamentu no husu Ministéiru Públiku atu aselera prosesu investigasaun ba kazu Ró Haksolok tanba iha prosesu justisa.
Notísiarelevante:https://tatoli.tl/2025/10/11/fretilin-ninia-komentariu-ba-ro-haksolok-orsamentu-iha-hela-fundu-espesial-raeoa/
Jornalista: Nelson de Sousa
Editór Evaristo Soares Martins
