OEKUSI, 15 Outubru 2025 (TATOLI) – Prezidente Autoridade Rejiaun Administrativa Espesiál Oekusi Ambeno (RAEOA), Régio da Cruz Salu, aloka fundu rihun $85,957.58 husi Orsamentu Jerál Estadu (OJE) 2025 nian hodi konstrui postu saúde ida iha suku foun Kutete sub-rejiaun Pante Makasar.
Notísia relavante:Autoridade RAEOA kansela rekrutamentu ofisiál apoia iha Kutete no Monemeko
Prezidente Autoridade RAEOA konfirma, konstrusaun ne’e nia prosesu liuhusi konkursu públiku ne’ebé pendente hela dezde mandatu Autoridade sesante sira, tan ne’e presiza aprova, nune’e bele instala fasilidade saúde ida iha komunidade Kutete.
“Ne’e nesesidade no tama ona iha Planu asaun anuál orsamentu 2025 nian, Autoridade Sesante hatuur ona nia prioridade, ha’u mai kontinua de’it, tanba prosesu halo tenderizaun ne’e pendente kedas, tanba mudansa estrutura autoridade sesante ba foun, entaun bainhira ami tama, ha’u haree nesesáriu ba komunidade suku foun Kutete, ha’u asina no aprova daudaun,” nia dehan iha Oekusi, ohin.
Notísia relavante:PNDS Oekusi aprova projetu rua hodi implementa iha suku Monemeko no Kutete
Xefe suku Kutete, José António Bana, agradese tanba suku foun, ne’ebé presiza tebes apoia fasiliddae públiku husi Governu atu fasilita komunidade sira bele asesu ho distánsia besik.
“Agradese tanba uluk ekipa saúde hamutuk ho obra públika identifika ona fatin, ne’ebé komunidade sira voluntarimente oferese rai, tanba Kutete dezde uluk to’o agora seidauk iha fasilidade saúde, maibé horseik ami haree autoridade aprova ona, entaun tempu-badak kompañia bele hahú serbisu ona. Ne’ebé, ami agradese tanba ami suku foun, presiza tebes fasilidade públika husi Governu,” nia tenik.
Notísia relevante:Estrada kotu, difikulta komunidade Kutete lori produtu lokál ba merkadu
Konstrusaun postu saúde Kutete ho valór rihun $85,957.58 husi kompañia Rainha Mena Unipesoál Lda.
Notísia relevante:Profíl suku pilotu Kutete Oé-Cusse
Jornalista: Abílio Elo Nini
Editór: Rafael Ximenes de A. Belo
