Autoridade RAEOA kansela projetu aterru lagoa Masin to’o Oébau
OEKUSI, 15 Outubru 2025 (TATOLI) – Prezidente Autoridade Rejiaun Administrativa Espesiál Oekusi Ambeno (RAEOA), Régio da Cruz Salu, ofisialmente, kansela ona projetu aterru lagoa husi bairru Masin to’o bairru Oébau perténsia suku Costa sub-rejiaun Pante Makasar, ne’ebé ezekuta husi empreza internasionál Seagell Resort iha otél Oé-Upun nia oin.
Tanba ne’e, antes ne’e, Autoridade RAEOA entrega ona karta xamada ba empreza atu labele kontinua aterru, no sei konvida empreza hodi halo diskusaun téknika, tanba konstrusaun ne’e autoriza husi Prezidente Autoridade Sesante, Rogério Tiago Lobato.
“Ita sei konvida kompañia halo diskusaun ho kompañia nu’udar parseiru estratéjika, ami espresa ona indiretamente ba kompañia katak povu rejeita, atu halo aterru, entaun ita tenke respeita nafatin povu Oekusi nia karaterístika. Ha’u mós reprezenta Autoridade RAEOA, esklarese iha ne’e, ami la konkorda no la aseita atu aterra lagoa husi Masin mai to’o Oébau,” Prezidente Autoridade ba jornalista sira iha Oekusi dehan.
Notísia relevante:PSIK ho SNI buska apreensaun no desmantela jogu online ilegál iha Oekusi
Nia informa, razaun husi kanselamentu tanba nu’udar Oekusi-oan mak hatene nia fundamentalidade no objetivu kona-ba lagoa ne’e, nia funsionamentu ba agro-ekolojíku, kultura sosiál no mós asuntu ekonómiku balun.
Maibé hanesan parseiru estratéjiku, Autoridade RAEOA sei konvida empreza atu tuur hamutuk ko’alia ba malu, tanba daudaun ne’e mós Governu aprova ona rezolusaun númeru 54/2025, loron 02 fulan-Outubru kona-ba kanselamentu ba lisensa operasaun jogu no aposta online iha Oekusi.
“Kompañia Seagell Resort nu’udar parsériu estratéjiku mai tanba ho vontade, no autoridade sesante mós ho vontade di’ak atu dezenvolve Oekusi, maibé ba oin sei tuur hamutuk ho kompañia atu identifika potensialidade no risku, nune’e halo dezenvolvimentu ida ho dignu ba Estadu no povu nia dignidade, tanba kompañia mós kontribui ona reseita ba Estadu, ne’ebé ita sei haree nia institusionál,” nia hateten.
Xefe suku Costa, Francisco Colo, agradese tanba antes ne’e komunidade sira rejeita kedas atu halo aterru ba lagoa masin to’o Oebau, tanba bele afeta dezastre naturál no hamate atividade ekonomia agrikultór sira.
“Antes ne’e ha’u rasik konsulta ho komunidade la aseita atu halo aterru, tanba lagoa ne’e dezde uluk to’o agora komunidade utiliza ba atividade ekonomia, te’in masin fa’an ba merkadu. Parte seluk, kuandu aterru, entaun tempu udan bele akontese dezastre tanba bee sei laiha fatin atu nalihun, ita haree lagoa ne’e iha komunidade nia klaran, maibé agradese tanba autoridade sei kansela karik, ne’e di’ak liután, tanba inisíu ema barak rejeita kedas,” nia haktuir.
Notísia relevante:Autoridade RAEOA sei muda projetu otél ne’ebé besik monumentu Lifau
Entretantu, tuir observasaun jornalista Ajénsia Tatoli,I.P iha terrenu, antes ne’e empreza Seagell Resort husi Malázia halo ona aterru ho rai-henek, maibé to’o Setembru ne’e paradu ona to’o ohin loron.
Jornalista: Abílio Elo Nini
Editór: Rafael Ximenes de A. Belo
