g7+ asina MoU ho Principles for Peace Foundation Jenebra Suisa hodi promove páz

JENEBRA, 14 Outubru 2025 (TATOLI)-Organizasaun g7+ liuhosi Sekretáriu Jerál, Helder da Costa, tersa ne’e, asina memorandum of understanding (MoU) ho Fundadora no atuál Diretora Ezekutiva, Principles for Peace Foundation, Hiba Qasas, hodi promove páz iha nasaun membru g7+ no mós kontinente sira seluk ne’ebé maka daudaun ne’e sei moris iha situasaun frajíl.

Notísia Relevante :Organizasaun g7+ partisipa diskusaun páz internasionál iha Jenebra

MoU ne’e mós nu’udar oportunidade di’ak ida ba Principles for Peace hodi lansa relatóriu kona-ba Peace Navigator hodi foka ba asuntu importante haat maka hanesan; apoiu peskiza konjunta, kolaborasaun hodi organiza inisiativa ne’ebé relevante iha área hari’i páz no hari’i Estadu, fasilita aprendizajén entre maluk sira no interkámbiu Súl-Súl no ikus advokasia no influénsia polítika.

“Sira hakarak ajuda g7+ iha área peskiza atu nasaun seluk implementa konkordu peace agreement, depois g7+ no PPF servisu hamutuk atu identifika nasaun sira hodi fahe sira-nia lisaun ba nasaun seluk iha organizasaun g7+,” Vise Sekretáriu Jerál, Habib Mayar hateten ba TATOLI, iha Jenebra, tersa ne’e.

Akordu ne’e atu oinsá parte rua servisu hamutuk análiza previzaun no prodúz koñesimentu bazeia ba evidénsia hodi apoiu prioridade g7+ hodi harii pás, governasaun, no hametin institusionál.

Nune’e mós parte rua sei konvoka espasu ba previzaun no inkubasaun nian hodi diskute estratéjia iha área hanesan mediasaun, reziliénsia klimátika, no finansiamentu, enkuantu forñese apoiu asesoria ba mekanizmu sira hanesan forsa tarefa mediasaun hari’i dame nian.

Liuhusi enkuadramentu Harnessing collective wisdom sei fasilita aprendizajén estruturadu entre nasaun membru g7+ sira, troka lisaun, no dezenvolvimentu modelu finansiamentu dame nian ne’ebé inovativu liuhosi aproveita rede no rekursu globál Principles for Peace nian.

Ikus liu, kolaborasaun ne’e sei hametin g7+ nia advokasia iha fórum polítika internasionál sira, hodi hasa’e nia papél nu’udar lian kredível ida kona-ba dame, reziliénsia, no lejitimidade iha diálogu globál sira.

Iha fatin hanesan, Fundadora no atuál Diretora Ezekutiva, Principles for Peace Foundation, Hiba Qasas, sente kontente ho estabelesimentu MoU entre g7+ Principles for Peace Foundation ne’e,  importante tebes atu hametin parseiru ida ne’ebé metin no forte iha tempu naruk hodi promove páz, reziliénsia, no seluk tan.

“Ami hare esperénsia Timor-Leste ne’ebé iha nia istória ne’ebé susesu, tranzisaun ida ne’ebé susesu, ne’e inspira ami,” nia hateten.

Notísia Relevante :Partisipante enkontru Geneva Peace Week apresia esperénsia Timor-Leste

Jornalista : Agapito dos Santos

Editór       : Florencio Ximenes