MPIE ezekuta 63,03% husi OJE 2025
DILI, 15 Outubru 2025 (TATOLI)— Ministériu Planeamentu no Investimentu Estratéjiku (MPIE) to’o loron 13 Outubru ne’e, ezekuta ona $2.721.032,84 (63,03%) husi Orsamentu Jerál Estadu (OJE) 2025 husi totál alokasaun $4.316.909.
Orsamentu ne’ebé aloka ba MPIE fahe kategoria tolu mak hanesan saláriu no vensimentu $2.636.773 ezekuta ona $1.718.731,40 (65,18%), bens no servisu $967.901,44 (60,3%), kapitál menór $62.500 ezekuta ona $32.100 (40,64%).
“Maibé ita konta hotu obrigasaun sira ho totál $2.901,750,77 ezekusaun bele atinje (67,22%),” Ministru Planeamentu no Investimentu Estratéjiku, Gastão de Sousa informa ba Ajénsia TATOLI, iha ninnia knaar-fatin, Kuarta ne’e.
MPIE nia planu loloos to’o ohin loron atu ezekuta ona maizumenus 75%, maibé la atinje, ne’ebé seidauk tuir nível ne’ebé projeta ona.
“maski nune’e, ita iha nafatin tempu atu foti medida nesesária sira hodi kontribui ba ezekusaun ne’ebé efikás no efisiente tuir planu,” nia akresenta.
Notísia relevante : MPIE propoin millaun $1 ba saláriu vensimentu
Iha biban ne’e, nia parte mós esplika MPIE rasik iha institutisaun haat mak tutela hanesan Fundu Dezenvolvimentu Kapitál Umanu (FDCH, sigla portugés), Komisaun Nasionál Aprovizionamentu (CNA, sigla portugés) Ajénsia Dezenvolvimentu Nasionál (ADN) no Konsellu Administrasaun Fundu Infaestrutura (KAFI).
Maibé kada instituisaun ezekuta orsamentu tuir idaidak planu no programa. ADN rasik iha OJE 2025 aloka orsamentu hamutuk $4.917.208, ba saláriu no vensimentu $3.151.605 ezekuta ona $2.232.993,93 (71%), bens no servisu $886.060 ezekuta ona $561.212,10 (63%), kapitál menór $400.000 ezekuta ona $386.480,28 (97%), kapitál dezenvolvimentu $479.543 ezekuta ona $363.781,13 (76%). Husi kategoria haat ne’e ADN ezekuta ona $3.544.467,44 (72%).
Ba FDCH iha alokasaun OJE 2025 hamutuk $18.973.544, ne’ebé husi orsamentu ne’e aloka ba programa haat mak hanesan Formasaun Profisionál hamutuk $1.223.780 ezekuta ona $824,270 (67%), Formasaun Tékniku $2.051.682 ezekuta $1.470.764,51 (67%).
Enkuantu, ba programa Bolsa Estudu $13.956.821 ezekuta ona $8.464.545.57 (62%), programa Funsionamentu no Dezenvolvimentu Instituisionál $1.741.261 ezekuta ona $1.164.465,16 (62%), totál ezekusaun hamutuk $11.923.955,24 (63%).
Kona-ba ezekusaun ba CNA alokadu hamutuk $2.139.531 ba kategoria rua mak hanesan saláriu no vensimentu $1.643.717, bens no servisu $396.014, husi orsamentu ne’e totál ezekusaun to’o 14 Outubru hamutuk $1.437.267,94 (67%).
Kona-ba KAFI mai husi fundu Governu no empréstimu hamutuk $312.203.618, ezekuta ona $93.698.228 (30,0%).
Jornalista : Arminda Fonseca
Editora : Julia Chatarina
