Timor-Leste nia preparasaun adere ba ASEAN kuaze atinje faze finál
DILI, 15 Outubru 2025 (TATOLI)—Vise-Ministra ba Asuntu ASEAN, Milena Maria da Costa Rangel, hateten Timor-Leste nia preparasaun ba membru plenu ASEAN kuaze atinje ona faze finál.
Notísia Relevante:
“Preparasaun kuaze finál ona no pratikamente Timor-Leste konklui hotu ona rekezitus no negosiasaun sira,” Vise-Ministra Asuntu ASEAN informa ba jornalista sira iha Palásiu Governu, kuarta ne’e.
Ministra ne’e hatutan, katak maske iha akordu balun mak sei iha mudansa ba parte balun maibé pratikamentu konkluidu hotu ona rekezitu sira-ne’ebé iha kuaze prienxe hotu ona.
Aleinde ne’e, nia informa, daudaun ne’e sira kontinua servisu hamutuk ho Prezidente ba ASEAN 2025 iha Malázia, Dato’ Seri Anwar Ibrahim, hodi haree ba programa simeira ASEAN nian ne’ebé ofisialmente fó biban mós ba Timor-Leste hodi sai membru plenu ba ASEAN.
“Prepara hela planu ba pos-adezaun nian hodi implementa hotu akordu ne’ebe durante ne’e ita halo no planu ba futuru saida mak ita atu halo, bainhira ita ofisialmente sai ona membru ASEAN iha tinan 2025 to’o 2030,” nia hateten.
Jornalista : Alexandra da Costa
Editór : Cancio Ximenes
