OEKUSI, 20 Outubru 2025 (TATOLI) – Sekretáriu Estadu Ensinu Sekundáriu Jerál (ESG, sigla Portugés) no Ensinu Tékniku Vokasionál (ETV), Domingos Lopes Lemos, akompaña husi Prezidente Autoridade Rejiaun Administrativa Espesiál Oekusi Ambeno (RAEOA), segunda ohin, abertura ezame nasionál iha Eskola Sekundáriu Jerál (ESG, sigla portugés) Baqui suku Naimeko sub-rejiaun Pante Makasar.
Iha sesaun abertura Governante ne’e, espera katak, prosesu ezame nasionál ne’e, normalmente kada tinan sempre realiza, nune’e estudante sira bele fó resposta ba pontu ezame iha loron tolu ne’e hatudu rezultadu di’ak no apela profesór vijilánsia sira, mantein iha eskola ne’ebé destina ba, nune’e bele garante ezame nasionál ne’e la’o di’ak.
Imajen TATOLI/Abílio Elo Nini
“Tenke garante vijilánsia ho di’ak, estudante idak-idak mak determina nia-aan, durante eskola tinan tolu, ohin habadak ba loron tolu, signifika iha loron tolu ne’e, alin sira deside ona sira-nia futuru, liu-liu ensinu báziku no desimu segundu anu ba ensinu sekundáriu jerál no tékniku vokasionál. Tan ne’e, tenke foku estuda tanba susesu ne’e iha estudante idak-idak nia liman rasik. Laiha susesu husi ema seluk. Be’e mak tenke prepara aan didi’ak iha uma durante loron tolu ne’e, bele mai halo kompetisaun ho di’ak iha prosesu durante loron tolu,” nia hateten iha sesaun abertura hala’o iha ESG Baqui Oekusi, ohin.
Notísia relevante:Estudante Oekusi rihun-tolu resin rejistadu sei partisipa ezame nasionál
Iha biban ne’e, Prezidente Autoridade RAEOA, Régio da Cruz Salu, enkoraza estudante sira, atu prepara estuda labele haluha reza mós ba Aman Maromak, atu hado’ok-aan husi tentasaun oioin.
“Ezame nasionál ne’e loke tan dalan ba serbisu obrigatóriu integradu sistematiku ba dezenvolvimentu setór edukasaun. Tan ne’e, ha’u-nia mensajen badak de’it ba oan sira, katak prepara estuda no keta haluha mós reza ba Aman Maromak, nune’e bele hado’ok ita husi tentasaun no tulun ita sele ultrapasa ezame ne’e ho saúde di’ak atu atinje rezultadu durante loron tolu,” nia apela.
Notísia relevante:Edukasaun Oekusi suspende atividade letiva hodi konsentra ba ezame nasionál
Diretór Diresaun Rejionál Edukasaun no Solidariedade Sosiál, Vincencio Cono, relata, totál estudante ne’ebé atu partisipa iha ezame nasionál loron 20 Outubru ne’e hamutuk 3.112, komposta husi Ensinu Báziku Sentrál (EBC) 1.602, Eskola Sekundáriu Jerál (ESG, sigla portugés) 1.062 husi siénsia téknolojia 554 no siénsia sosiál 508, Ensinu Tékniku Vokasionál 448.
Nia apela ba dirijente eskola, inan-aman inklui estudante no profesór vijilante sira, atu kumpre regra no motiva oan sira atu labele mete seremónia iha kalan no kuida atu evita dezastre naturál.
“Tanba ne’e husu primeiru inan-aman sira atu aplika edukasaun informál katak atu haree oan sira, evita nia movimentasaun atu evita mós dezastre oi-oin. Segundu, husu ba estudante sira estuda maka’as liu-liu matéria ne’ebé aplika durante prosesu aprendizajén simu ona liu-liu matrix exame nasionál ba tinan ne’e atu labele lakon futuru,” nia fó hanoin.
Notísia relevante:ME distribui ona pontu ezame nasionál ba eskola iha territóriu
Totál estudante finalista ne’ebé atu tuir ezame nasionál iha 2025 ne’e hamutuk 56.040 kompostu hosi ensinu báziku 26.743, ensinu sekundáriu jerál 25.012, ensinu sekundáriu tékniku vokasionál iha 3.717, programa nasionál ekivalénsia ensinu báziku 411 inklui estudante ne’ebé husu autoprostu iha ema 157.
Nune’e mós, sentru uza ba ezame nasionál, iha ensinu báziku nian hamutuk 352, sentru ba ensinu sekundária jerál 150, ensinu sekundáriu tékniku vokasionál iha 23 no sentru ba programa nasionál ekivalénsia ensinu báziku 19.
Purtantu, iha segunda 20 Outubru ohin, ba ensinu báziku hahú ho dixiplina matemátika ho ingléz, tersa-feira língua portugeza ho istória no jeografia, kuarta-feira dixiplina siénsia fízika naturál no tétun, ezame lokál iha sesta ho dixiplina relijiaun.
Kona-ba ensinu sekundáriu jerál iha loron segunda ohin ne’e, hahú ho matemátika, ekonomia ho métodu kuantitativu, tersa-feira língua portugeza ho kímika, kuarta-feira biolojia ho sosiolojia, kinta-feira língua tétun.
Jornalista: Abílio Elo Nini
Editór: Rafael Ximenes de A. Belo
