OEKUSI, 21 Outubru 2025 (TATOLI) – Prezidente Autoridade Rejiaun Administrativa Espesiál Oekusi Ambeno (RAEOA), Régio da Cruz Salu, tersa ne’e, selebra kontratu ho parseiru estratéjiku hanesan Organizasaun naun-Governamentál (ONG) 28 hodi apoia verba ho montante rihun $300-resin atu halo advokasia ba prosesu dezenvolvimentu sira iha Oekusi.
Notísia relevante:Régio Salu komprometidu sei ezekuta fundu sosiedade sívil iha mandatu fulan tolu
Iha biban ne’e, Prezidente Autoridade RAEOA, Régio da Cruz Salu, esplika katak, objetivu husi apoia fundu ne’e atu ajuda parseiru sira atu foku ba prinsípiu komplementaridade trajetora, ho nia rekomendasaun sira atu halo advokasia ba identidade no karatér umanu ne’ebé inovadora no orgullu, emprendedorista no ema ne’ebé kriativa.
Rekomendasaun seluk, ba dezenvolvimentu papél institusionál atu fó importánsia ba edukasaun karatér umanu nu’udar fiar-na’in, no apoia ba serbisu kampaña konservasaun no prezervasaun bee-moos inklui produsaun seguransa alimentár no edukasaun ba kapasitasaun nian.
Tanba ne’e, nu’udar Autoridade espera katak, ho fundu subvensaun públika 2025 nian, iha 2026 organizasaun sosiedade sívil sira, ne’ebé iha méritu no obrigasaun morál atu apoia Governu no povu, tanba sira (ONG) direitamente ho povu atu asesu fundu ne’e.
“ONG sira mak besikliu povu iha baze, esperiénsia tinan barak ona, entaun ohin kontinuasaun husi autoridade sesante, ita mós kontinua ezekuta saida mak aloka kada tinan iha fundu subvensaun públiku ne’e,” nia ko’alia molok selebra akordu iha Oekusi, ohin.
Notísia relevante:PM Xanana atribui prioridade neen ba PA RAEOA ezekuta durante fulan tolu
Autoridade ne’e esplika, alokasaun fundu subvensaun públika ne’e kumpre prosedimentu lei ne’ebé régula ona, hahú husi prosesu identifikasaun no prosesu atu finánsia no deside valór haree ba komplementaridade no trajetora, nune’e bele la’o ho di’ak.
“Fundu subvensaun públika ne’e, atu apoia sosiedade sívil sira-ne’e, sei la aplika birokrásia komplikadu, tanba ita hakarak prosesu ne’e lalais, tanba ONG sira mak besikliu ho povu iha baze,” nia afirma.
Diretór Asosiasaun Juventude Tane Oekusi Enklave, João Edmundo Caunan, reprezenta ONG sira, agradese Governu maske selebrasaun subvensaun públika atraza maibé konsege ezekuta, nune’e bele haforsa serbisu ONG sira.
“Ha’u reprezenta maluk ONG sira, ami agradese tanba Autoridade la haluha ami. Ami mós hatene tuir loloos selebrasaun antes ona, maibé tanba mudansa estrutura RAEOA, tanba ne’e, ami promete ho fundu ne’e, ami sei ezekuta tuir rekomendasaun sira-ne’ebé Governu propoin ona, tanba ne’e osan povu tenke jere ho di’ak no fó benefisíu ba povu liuhusi ami-nia intervensaun sira iha baze,” nia orgullu.
Notísia relevante:Autoridade RAEOA selebra kontratu ho asosiasaun ualu tau matan ba problema sosiál
Entretantu, tuir dokumentu livru Orsamentu Jerál Estadu (OJE) 2025 RAEOA nian, iha alokasaun orsamentu ba Transferénsia Públika ba Divizaun Gabinete Prezidente Autoridade (GPA) okupa 20.70% ekivalente ba $920,760.00 505. Husi montante ne’e, alokasaun orsamentu ikus liu mak Transferénsia Publika ne’ebe okupa 7% ho objetivu atu apoiu parseiru dezenvolvimento hanesan Programa Nasaun Unida ba Dezenvolvimentu (PNUD), ONG lokál sira no seluktan.
Jornalista: Abílio Elo Nini
Editór: Rafael Ximenes de A. Belo
