DILI, 21 Outubru 2025 (TATOLI)—Institutu Jestaun Ekipamentu no Apoiu Dezenvolvimentu Infraestrutura (IGEADE) rejistu pedidu hodi halo normalizasaun ba akontesementu dezastre naturál hodi sobu infraestrutura bázika hanesan mota, estrada, edifísiu iha territóriu nasionál hamutuk 205 hahú husi Janeiru to’o Outubru 2025.
Notísia Relevante: Ema na’in-126 husi munisípiu lima afetadu dezastre naturál durante loron 09-15 Juñu 2025
Prezidente Institutu Jestaun Ekipamentu no Apoiu Dezenvolvimentu Infraestrutura (IGEADE), Ana Paula da Cruz, hateten durante ne’e sira rejistu tuir relatóriu ne’ebé iha hamutuk 205, ne’e ba parte barak hanesan eskola, sentru saúde, edifísiu mota no estrada.
“Bainhira ami simu ona pedidu normalmente haruka kedas ekipa tékniku sira tun uluk hodi foti dadus,” Prezidente Institutu Jestaun Ekipamentu no Apoiu Dezenvolvimentu Infraestrutura (IGEADE), Ana Paula da Cruz, informa ba Agência Tatoli liuhusi telefónika, ohin.
Dirijente ne’e informa, pedidu 205 ne’e mai husi territóriu Timor laran tomak, kuaze pedidu barak mak ona mak sira resposta no balun seidauk resposta, tanba komunidade balun iha problema ho rai maibé sira-ne’ebé presiza emerjénsia hakarak ka lakohi sira tenke tun hodi rezolve.
“Pedidu barak ne’ebé ami resposta tanba IGEADE iha brigada lima ne’ebé koloka ba iha territóriu tomak no kada brigada ami destaka ekipamentu kompletu hanesan buldozer, eskavatór, silindru, motor greber no kamioneta (truck),” nia dehan.
Entretantu, kada brigada ida sempre fahe ba pakote rua ka tolu, iha brigada Maliana ninia área kobertura iha Bobonaru, Likisa, Ermera, brigada Suai nia kobre ba Suai no Ainaru, brigada Natarbora nia área kobertura iha Manatutu no Manufahi, brigada Baukau ninia área kobertura iha Baukau, Vikeke no Lautein, brigada Dili kobre ba Aileu no Likisa sorin balun.
“Ho pakote sira-ne’e sufisiente ba apoiu servisu IJE nian maibé materiál sira-ne’e balun ladun funsiona ho di’ak tanba eziste tinan naruk nia laran ona, nune’e servisu balun ladun forsa,” nia hateten.
Manutensaun ba mákina sira-ne’e hotu hamutuk rihun $500 ba kada tinan, maibé manutensaun halo troka oleu ba mákina sira-ne’e la presiza lori mai to’o nasionál tanba fasilidade destaka ba kada brigada iha, enkuantu bainhira manutensaun ba problema ne’ebé mak boot sei lori mai nasionál hodi halo manutensaun ba mákina ne’ebé avaria.
“Tanba ne’e, ami tau ona iha planu ba tinan oin hodi investe tan mákina sira, maske antes ne’e parseiru JICA iha tinan kotuk apoiu mákina unidade 26 no iha tinan ida-ne’e sira fó tan mákina rua,” nia dehan.
Notísia Relevante: APC rejista tipu kazu dezastre naturál oioin iha territóriu nasionál
Jornalista : Alexandra da Costa
Editór : Cancio Ximenes
