OEKUSI, 22 Outubru 2025 (TATOLI) – Empreza lokál Numtimo Unipesoál Lda, ofisialmente entrega ona mobiliáriu hanesan kadeira, mákina impresora inklui komputadór ba atendimentu públiku iha Diresaun Rejionál Terra no Propriedade inklui Rejistu Sívil Konservatóriu Notariadu Rejiaun Administrativa Espesiál Oekusi Ambeno (RAEOA).
Notísia relevante:Fasilidade atendimentu iha Rejistu Sívil Notariadu RAEOA presiza manutensaun
Fasilidade ne’ebé empreza Numtimo oferese ba Rejistu Sívil Konservatóriu Notariadu hamutuk 16 komposta husi, printer L1300 tipu Epson haat (4), mákina fotokopia ho tipu Epson L15180 all-one A3 rua (2), printer HP laserjet MFP 137fnw hitam-putih rua (2), laptop dell latitude 5420, core 15 gen 11, RAM 16gb, SSD 512gb, ori 16gb, SSD 256gb, layer 14 inci-touchscreen iha rua (2), no mós komputadór HP all in one PC24-CB1888D i3-1215U, 8gb/16gb 512gb 28,8.
Nune’e mós fasilidade sira ba Diresaun Rejionál Terra no Propriedade hamutuk 13 mak hanesan, printer L1300 TIPU Epson haat (4), printer HP laserjet MFP 137fnw hitam-putih rua (2), komputadór HP all in one 24-ero200d (pel/pjn) 13th Gen-intel Core 113-1315V-1.20 GHZ/memory DO D4 BGB/55D512GB windows 11 home sl/Office home 2021/23.8inch iha rua (2) inklui kadeira masa 200, kadeira besi unidade lima (5) ba diresaun rua ne’e.
Tanba ne’e, Diretór Diresaun Rejionál Terra Propriedade, Jose Ase Neno Colo, konsidera fasilidade no mobiliáriu hirak-ne’e, nesesáriu ba diresaun rua, atu mellora prestasaun serbisu, hodi responde ba nesesidade públiku.
“Ohin ita simu ona ekipamentu husi kompañia, importante tebes atu fasilita funsionáriu sira iha diresaun rua, tanba ita hatene fasilidade antes ne’e balun avária, tanba utiliza tinan barak ona, entaun tinan kotuk, Autoridade RAEOA loke konkursu ida, nune’e bele fornese materiál,” nia dehan ba jornalista hafoin ramata seremónia entrega iha Oekusi, ohin.
Iha biban ne’e, nia enkoraja funsionáriu sira, atu utiliza tuir nesesidade serbisu Estadu nian, nune’e bele dura ba tinan barak tanba durante ne’e, públiku preokupa ho atendimentu iha Diresaun Notariadu liu-liu atu prodús Billete Identidade (BI), Sertidaun RDTL, sertidaun moris no mate tanba falta ekipamentu.
“Ha’u-nia mensajen ba servidór sira, katak, ekipamentu sira-ne’ebé ohin fornese mai ne’e, tenke kuidadu, uza tuir saida mak atu halo nesesidade públiku, tanba ida-ne’e sosa hodi fasilita atendimentu públiku, entaun tenke kuida, hodi sasan sira ne’e tenke dura ho tempu-naruk, tanba funsionáriu iha notariadu na’in-51 no husi terra propriedade nian 80, entaun ita barak, maibé importante uza ho responsabilidade tanba sasán sira-ne’e Estadu nian,” nia apela.
Notísia relevante:MJ promete rezolve problema emisaun dokumentu iha notáriadu Oekusi
Iha fatin hanesan, Diretora Kompañia Nuntimo Unipesoál Lda, Regina Ola, agradese ba konfiansa Autoridade RAEOA, atu fornese materiál ba Diresaun Terra no Propriedade no Rejistu Sívil Konservatóriu Notariadu
“Konfiansa ne’ebé ami hetan, ami tenke iha responsabilidade. Tan ne’e, ami esforsa to’o ohin loron tenke entrega ona tuir kontratu no rekomendasaun husi Autoridade RAEOA nian, hodi fornese ekipamentu hanesan komputadór, printer no kadeira masa no besi. Ne’ebé, ami agradese tanba durante ne’e, hetan mós apoia liuhusi koordenasaun, atu oinsá materiál sira-ne’e bele to’o lalais diresaun sira atu garantia serbisu ba atendimentu públiku nia hakarak,” nia hateten.
Notísia relevante:Fornesimentu materiál ba notariadu Oekusi sei gasta rihun $206-resin
Entretantu, antes ne’e Autoridade RAEOA anúnsia liuhusi solisitasaum kuotasaun (RFQ), ho nia verba orsamentu hamutuk rihun $16,100.00, ne’ebé aloka husi Orsamentu Jerál Estadu (OJE) 2025 nian.
Jornalista: Abílio Elo Nini
Editór: Rafael Ximenes de A. Belo
