DILI, 22 Outubru 2025 (TATOLI) – Institutu Nasionál Estatístika Timor-Leste (INETL) lansa relatóriu Índise Presu Konsumidór (IPK) ba fulan-Setembru nian ne’ebé rejista inflasaun 0,1% kompara ho Agostu 0,2%.
Prezidente INETL, Elias Ferreira, hateten mudansa presu sa’e 0,1% tanba hetan kontribuisaun husi grupu hahán no bebidas la’ós alkoólika 0,1%. Grupu alkoól no tabaku tun 0,2% no ekipamentu no manutensaun mobiliáriu uma-laran tun 0,1%, ne’ebé sai hanesan mudansa kontráriu ba inflasaun grupu hotu mensál nian.
“Ita-nia grupu hahán no bebida la’ós alkoólika sa’e 0,1% tanba hetan impaktu maioria husi subgrupu modo-tahan sa’e 0,5%, ikan no hahán tasi 0,9%, masin-midar, marmelada, bani-been, xokolate no hahán midar 0,3%, mina no bokur 0,1% no na’an 0,1%”, Elias Ferreira hateten iha Kaikoli, Dili.
Nia esplika kona-ba subgrupu produtu ai-han tun 0,7%, ai-fuan tun 0,7%, no paun no sereál 0,4%, ne’ebé sai hanesan mudansa kontráriu ba inflasaun grupu hahán no bebida la’ós alkoólika ba Setembru 2025.
Iha mudansa persentajen IPK anuál sa’e 0,9% kompara entre Setembru tinan 2025 no Setembru 2024, hetan kontribuisaun husi grupu hahán no bebida la’ós alkoólika sa’e 2,0%, edukasaun 0,4%, ekipamentu no manutensaun mobiláriu uma-laran 0,8%, uma 1,3%, rekreasaun no kultura 0,4% ba anuál Setembru 2025.
Ba grupu transporte tun 0,8%, alkoól no tabaku 3,5% no komunikasaun 0,2%, sai hanesan mudansa kontráriu ba inflasaun grupu hotu ba anuál Setembru 2025.
Ba inflasaun tradeable laiha mudansa 0,0% no non-tradeable sa’e 0,3% iha mensál, kompara entre fulan-Setembru tinan 2025 no Agostu 2025. Inflasaun tradeable sa’e 0,8% no non-tradeable sa’e 1,0% iha anuál, kompara entre Setembru tinan 2025 no Setembru 2024.
Notísia relevante: IPK iha Jullu rejista inflasaun sa’e 0,2%
Jornalista: Arminda Fonseca
Editora: Maria Auxiliadora
