DILI, 23 Outubru 2025 (TATOLI)—Governu liuhusi Sekretáriu Estadu Komunikasaun Sosiál (SEKOMS), Expedito Dias Ximenes, informa SEKOMS identifika ona jormalista na’in-10 ba halo kobertura iha serimónia internasionál ámbitu Timor-Leste nia adezaun ba Asosiasaun Nasaun Sudeste Áziatiku (ASEAN) sai membru ba da-11, iha Kuala Lumpur-Malázia.
Notísia Relevante: Timor-Leste adere ba ASEAN sei dezenvolve ekonomia no igualdade jéneru
Sekretáriu Estadu Komunikasaun Sosiál, Expedito Dias Ximenes, relata hanesan ita hotu-hotu hatene seremónia internasionál adezaun Timor-Leste nia ba ASEAN ne’ebé ofisialmente sai membru 11.
“Preparasaun Governu husi Sekretária Estadu Komunikasaun Sosiál iha área jornalizmu nian, entaun esforsu ne’ebé ami halo hamutuk ho Ministériu Negósiu Estranjeiru no Kooperasaun inklui Vise-Ministra ba Asuntu ASEAN, konsege hetan akreditasaun jornalista na’in-10 husi plataforma dijitál, mídia konvensionál no imprensa hodi halo kobertura iha Malázia,” Sekretáriu Estadu Komunikasaun Sosiál, Expedito Dias Ximenes, informa ba Agência Tatoli iha ninia knaar fatin, Palásiu Governu, ohin.
Dirijente orgaun komunikasaun ne’e dehan durante preparasaun jornalista sira mós hetan ona briefing husi Vise-Ministra ba Asuntu ASEAN no ohin sira halo press kit hodi aumenta tan sira-nia koñesimentu istória ho esforsu ne’ebé Timor-Leste halo molok tama-ba ASEAN.
“Jornalista na’in-10 ne’e sei akompaña Primeiru-Ministru hodi partisipa iha simeira ASEAN nian no delegasaun Primeiru-Ministru nian kompostu ho jornalista sira sei aranka iha sesta (24 Outubru 2025) dadeer ho aviaun Aero Dili,” nia dehan.
Aleinde ne’e, nia informa delegasaun husi Prezidente Repúblika mós sei asiste hotu iha serimónia istóriku ida-ne’e no sira aranka hotu iha loron ne’ebé hanesan maibé iha oras meudia nian.
Enkuantu, jornalista na’in-10 ne’e kompostu husi mídia kanál ofisiál Estadu nian mak mídia Rádiu Televizaun no Timor-Lorosa’e (RTTL, E.P), no Ajénsia Notisioza TATOLI (TATOLI, I.P) nune’e mós husi televizaun privadu maka Grupu Mídia Nasionál (GMN-TV), mídia imprensa husi Timor Post no Suara Timor-Lorosa’e (STL-CORP), no husi plataforma dijitál maka SMN-News no Mídia One-Timor.
Jornalista : Alexandra da Costa
Editór : Cancio Ximenes
