DILI, 24 Outubru 2025 (TATOLI)–Ekipa UNITAL Football Club (FC) sente orgullu ho rezultadu jogu mezmu derrota ho S’amuser iha jogu kontinuasaun Primeira divizaun Liga Futeból Femeninu Timor-Leste iha Estádiu Munisipál Dili, Sesta loraik ne’e.
Treinadór prinsipál UNITAL FC, Abel Barbosa, hato’o sentimentu orgullu ne’e relasiona ho rezultadu finál derrota 0-1 ho S’amuser FC tanba bainhira halo komparasaun entre jogadór iha ekipa rua, UNITAL FC maioria jogadór lokál no menus esperiénsia enkuantu S’amuser FC ekipa estrela tanba maioria husi ekipa selesaun nasionál.
“Maski derrota maibé orgullu tanba ha’u-nia maioria jogadór lokál maibe kompetitivu ho jogadór nasionál sira iha S’amuser FC,” Abel Barbosa informa.
Notísia relevante: S’amuser FC manán UNITAL ho skor mihis 0-1
Barbosa hato’o protestu ligadu ho penalidade ne’ebé hetan husi S’amuser tanba konsideradu árbitu foti desizaun la bazeia ba situasaun reál maibé rona liuhusi jogadór nune’e rezultadu ikus fó vitória ba S’amuser FC.
Maski nune’e, nia kompromete sei hadi’a fallansu hotu ne’ebé komete ona husi jogadór sira liuliu jogu rua ne’ebé hala’o ona hanesan AD SLB no S’amuser iha-ne’ebé konsideradu ekipa forte.
“Ha’u sei hadi’a, nune’e jogu tuirmai ami garante sei gaña pontu tanba ekipa forte rua ami hakat liu ona,” Barbosa promete.
Entretantu, provizoriamente S’amuser FC lidera tabela klasifikasaun ho pontu neen (6) hafoin manán rua (2), enkuantu UNITAL FC kontinua mantein iha pozisaun dasiak hafoin derrota rua (2) husi jogu rua (2).
Jornalista: Natalino Belo
Editór: Xisto Freitas da Piedade
