DILI, 28 Outubru 2025 (TATOLI)–Ekipa feto husi Asosiasaun Futeból Munisipál Aileu (AFMA) hakat bá finál Kopa Juvenil Sub-17 hafoin halakon Asosiasaun Futeból Munisipál Baukau (AFMB) ho skor 7-1 iha Estádiu Munisipál Dili, Tersa ne’e.
Aileu hetan tikete bá finál hafoin iha jogu meiu finál halakon ekipa Kulugisa ne’ebé lidera skor 4-1 iha parte dahuluk, iha-ne’ebé enxe husi jogadora sira hanesan Nifelia iha minutu 10, Epifânia 11, Natalizia 15, Alexandria iha minutu 38.
Notísia relevante: Ohin Kopa Juvenil Sub-17 hahú tama faze meiu finál
Enkuantu, ekipa AFM Baukau ne’ebé maioria reforsa husi jogadora lokál konsege responde golu ida iha minutu 23 liuhosi jogadóra Leila Martins.
Jogu ne’ebé hala’o iha minutu 40, ekipa Aileu domina jogu, nune’e iha parte daruak, jogadora Leliana konsege aumenta golu tolu iha minutu 44, 75 no 79, nune’e to’o jogu ramata tabela skor ikus 7-1.
Ho rezultadu jogu referidu, AFMA sei hasoru entre ekipa husi Munisípiu Ermera no Dili Leste iha finál, enkuantu Baukau sei hadau oportunidade hodi gaña terseiru lugár kompetisaun Kopa Juvenil Sub-17 tinan 2025.
Jornalista: Natalino Belo
Editór: Xisto Freitas da Piedade
