DILI, 30 Outubru 2025 (TATOLI) – Sekretáriu-Jerál ASEAN nian, Kao Kim Hourn, afirma bloku sudeste aziátiku sei la haruka observadór sira ba eleisaun Miánmar nian, ne’ebé marka ona ba finál dezembru 2025.
“ASEAN sei la haruka observadór sira ba eleisaun iha Miánmar nian, ne’ebé marka ona ba tinan ne’e nia rohan. Maske nune’e, Estadu-membru sira hetan lisensa hodi haruka ekipa observadór bilaterál sira,” hatete hosi sekretáriu-jerál Kao iha Sekretariadu ASEAN nian, iha Jakarta, kuarta ne’e.
Notísia relevante : Timor-Leste aprezenta ona karta ba Governu Myanmar
Sekretáriu-Jerál hato’o deklarasaun ne’e bainhira aprezenta rezultadu prinsipál sira hosi Simeira ASEAN ba da-47 no simeira sira ne’ebé iha relasaun ne’ebé foin lalais ne’e hala’o iha Kuala Lumpur, Malázia, hosi loron 25-28 fulan-Outubru tinan 2025.
Iha simeira ne’e, líder sira ASEAN nian reafirma kompromisu kontinuasaun ASEAN nian hodi tulun Miánmar hodi hetan solusaun pasífika no sustentável ba krize ne’ebé la’o daudaun, tanba Miánmar sai nafatin parte integrante ida hosi ASEAN.
Konflitu armadu iha fatin barak Miánmar nian kontinua aumenta, inklui ida ne’ebé maka kauza hosi junta militár, ne’ebé maka hetan akuzasaun ba krimi funu nian no krimi sira hasoru umanidade. Ema barak fiar katak situasaun umanitária iha Miánmar sai aat maka’as, liuliu iha tinan 2025 tomak.
Prezidente Repúblika Filipina, Ferdinand R. Marcos Jr, fó-sai katak, ASEAN la haruka observadór bá eleisaun sira iha Miánmar iha fulan-Dezembru.
“Ha’u hanoin buat ne’ebé akontese ona ne’e ASEAN husik hela ba nasaun ida-idak atu deside mesak. ASEAN sei la hola pozisaun komún. Tanba iha ita-nia diskusaun sira-ne’e, ema ida-idak iha ideia ne’ebé diferente,” nia dehan.
“Entaun, ita sei tenke deside ba Filipina saida maka ita hanoin ita tenke halo. Ami sei haree nasaun sira seluk atu haree saida maka sira tenke halo,” nia hateten
Notísia relevante : Konsensu 5PC ba Myanmar, PM Xanana : Timor – Leste apoia ninia implementasaun
Fonte: Antaranews/PNA
