DILI, 05 Novembru 2025 (TATOLI)—Kompetisaun Primeira Divizaun Liga Futeból Femininu Timor-Leste (LFFTL) jornada datoluk sei kontinua hikas iha Estádiu Munisipál Dili, Kinta (06/11/2025).
Tuir oráriu ne’ebé lansa husi Komisaun Organizadora LFFTL, kompetisaun primeira divizaun sei kontinua ba jornada datoluk iha-ne’ebé ekipa husi VDL FC sei kontra Maudoko FC ne’ebé sei hahú iha lorokraik tuku 16:00 Otl.
Aleinde ne’e, ekipa Akadémika FC sei kontra Buibere FC iha Sesta (07/11/2025), enkuantu S’amuser FC sei kontra ekipa Kulugisa ne’ebé atualmente okupa iha pozisaun dasiak tabela klasifikasaun LFFTL iha Sábadu (08/11/2025).
Notísia relavante: AD SLB lidera tabela klasifikasaun LFFTL troka Maudoko FC
Enkuantu, Maranatha FC hasoru ekipa AD SLB ne’ebé atualmente okupa iha pozisaun dahuluk tabela klasifikasaun no UNITAL FC kontra ekipa Na’in-Feto FC iha Domingu (09/11/2025).
Tuir tabela klasifikasaun, provizoriamente ekipa AD SLB lidera pozisaun dahuluk ho pontu neen (6), Buibere FC iha pozisaun daruak ho pontu neen (6), tuir kedas S’amuser pontu neen (6), iha pozisaun dahaat Maudoko FC ho pontu haat (4), Akadémika iha pozisaun dalimak ho pontu tolu (3), VDL pontu tolu (3) hodi okupa iha pozisaun daneen.
Ekipa Maranatha gaña pontu ida (1) hodi okupa iha pozisaun dahitu, UNITAL FC laiha pontu iha pozisaun daualu, enkuantu ekipa Kulugisa husi Baukau okupa pozisaun dasiak ho pontu 0 no pozisaun ikus okupa husi ekipa Na’in-Feto FC ho pontu 0.
Jornalista: Natalino Belo
Editór: Xisto Freitas da Piedade
