Konstrusaun sala pediatria andar lima iha HNGV sei entrega iha 2026

DILI, 05 Novembru 2025 (TATOLI)—Ministra Saúde, Elia dos Reis Amaral, informa kontrusaun sala pediatria andar lima iha Hospitál Nasionál Guido Valadares sei entrega ba Ministériu Saúde iha Fevereiru ka Marsu 2026.

Notísia Relevante: Konstrusaun sala pediatria andár lima no ICCU iha HNVG atinje ona 46%

“Ita iha traballu adisionál ida-ne’ebé mak ita hateten ba iha time line nian ba kontrusaun, ita haree ne’e loos. Maibé ba adisionál ba iha oxijéniu ne’e rasik, ita iha plantasaun oxijénu atu bele instala iha areadór andar lima ne’ebé ami sei informa provavelmente entre Fevereiru ka Marsu 2026,” Ministra Saúde, Élia dos Reis Amaral, hateten ba Jornalista sira iha resintu Parlamentu Nasionál, ohin.

Nia esplika, kona-ba maternidade ne’ebé mak foin daudaun lansa iha fulan-Agustu tinan ne’e mós nia progresu menus husi 5%.

“Ha’u hanoin kona-ba ida ne’e nia progresu menus husi 5%. Ita sei haree tan tanba ne’e foin hahú, entaun depois mak mak ami sei informa ba ita-boot sira,” nia relata.

Antes ne’e, Diretór Servisu Apoiu Diagnóstiku no Terapeutiku, Vidal de Jesus Lopes, informa hateten hanesan mensiona ona beibeik ona katak uma pediatria andar lima ne’e sei inaugura iha fulan-Dezembru tinan ne’e, maibé depende karik inaugura iha Janeiru 2026 bele utiliza ona.

Nia haktuir, ekipamentu barak mak sei prienxe iha pediatia andar lima, nune’e atu utiliza ba pasiente sira.

“Buat barak mak ita sei prienxe iha laran, fasilidade ekipamentu médiku ne’e, buat ida husi sempre to’o sufistikadu. Ohin ita tau mós ema tebes hatene operasionáliza, sasán sira-0ne’e lá’os fasil, ita sei fazeadamente. Ami mós hanoin kona ona to’o iha ne’ebá, atu nune’e to’o iha loron ne’e, ita ekipa mós bele inaugura ho di’ak no loron hirak tuir ita bele uza kedas,” nia dehan.

Jornalista : Felicidade Ximenes

Editór       : Cancio Ximenes