KOVALIMA,O5 Novembru 2025 ( TATOLI) – Komandu Polísia Nasionál Timor-Leste (PNTL), Munisípiu Kovalima rejista kazu asidente kma’an ida no insidente rua durante selebrasaun loron bo’ot finadu.
“Durante loron rua, ita la rejista kazu insidente no asidente ne’ebé la grave maibé ita rejista hanesan asidente kmaan ida hanesan motor rua soke malu ne’ebé akontese iha postu administrativu Zumalai, munisípiu Kovalima”, Komandante PNTL Munisípiu Kovalima, Superintendente Asistente Polísia Inacio Amaral, dehan ba jornalista sira iha Santa-Rosa, ohin.
Komandu mós rejista kazu insidente rua ne’ebé ida akontese iha suku Debos, Postu Administrativu Suai ho tipu kazu violénsia doméstika tanba oan hemu lanu baku kadeira no ameasa ba nia inan-rasik.
PNTL rejista kazu violénsia doméstika bainhira simu keixa husi viziñu, PNTL foti kedas autór ne’ebé maka halo asaun ba nia inan, nune’e nia prosesu PNTL bolu nia inan hodi halo prosesu tuir lei.
Rejista kazu insidénsia ida husi postu administrativu Fohorem sidadaun ida tenta atu oho-aan liuhusi dalan hemu veneno, tanba família ho viziñu hetan hodi komunika ba PNTL no ambulánsia transporta kedas ospitál referál Suai ne’ebé daudaun ne’e baixa hela.
Alende ne’e komandante informa kona-bá kazu insidente no asindente, informa mós kona-ba situasaun selebra loron boot finadu iha munisípiu Kovalima la’o ho pás no estabelidade.
“Situasaun seguransa durante selebra loron boot finadu ita selebra ho hakmatek no pás. Tanba PNTL hetan apoiu segurasan husi Komandu F-FDTL iha Tilomar, Unidade Espesiál Bataleon Ordem Públiku (BOP) , Unidade Polísia Maritima (UPM) , Unidade Polísia Fronteira”, nia afirma.
Jornalista: Celestina Teles
Editór : Florencio Miranda Ximenes
