Bobonaru iha ona karreta funeráriu tolu apoia transporta kadavér
BOBONARU, 06 Novembru 2025 (TATOLI) – Diresaun Servisu Munisipál Asaun Sosiál (DSMAS) Autoridade Munisípiu Bobonaru daudaun ne’e iha ona karreta funeráriu unidade tolu atu apoia família transporta kadavér ka mate-isin husi fatin ida ba fatin destinasaun.
Diretora Servisu Munisipál Asaun Sosiál, Autoridade Munisípiu Bobonaru, Maria Verdial de Sousa Gama, konfirma, loron hirak liubá karreta funeráriu ne’ebé Autoridade Munisípiu Bobonaru halo akizisaun ho orsamentu 2025 ne’e empreza entrega ona no daudaun ne’e hein de’it ona atu halo operasaun.
Notisía relevante:DSMAS Bobonaru apoia transporte hodi tula mate-isin 259 no kaisaun 21
“Ami hetan tan apoia iha tinan ida-ne’e sosa tan karreta ida hamutuk karreta tolu ona. Ida-ne’e bele tulun hakma’an ona ami-nia servisu,” nia informa ba jornalista sira, iha kna’ar-fatin, kinta ne’e.
Diretora ne’e rekuñese katak maske iha ona karreta unidade tolu, maibé seidauk sufisiente atu bele halo atendimentu ba suku 50, postu administrativu neen, maibé DSMAS mós iha mehi hakarak kada postu administrativu ida tenke iha karreta unidade ida hodi lori atendimentu besik liután ba komunidade.
Ezekutiva ne’e subliña, maski mehi ne’e seidauk atinje maibé DSMAS nafatin esforsu halo jestaun ba pedidu ne’ebé família matebian submete.
“Kada-vez pedidu husi postu ne’e rua-tolu, entaun ami labele halo atendimentu. Ami tenke tau prioridade ba pedidu ne’ebé tama uluk no mós ami labele halo atendimentu, dalaruma mate iha postu Atabae hakoi iha postu Atabae ita haree distánsia husi karru funeráriu husi fatin ida atu tula ne’e do’ok liu, entaun ami labele halo atendimentu. Ami tenke tau prioridade ba sira ne’ebé ezemplu mate iha Ospitál Maliana atu lori ba postu,” nia konklui.
Enkuantu hahú husi fulan-janeiru to’o loron (06/11/2025) ne’e DSMAS transporta ona mate isin hamutuk 320 kompostu husi mane 148 feto 116 ho kategoria bebé 36, ruin 19 no dokumentu laiha ida.
Notisía relevante:Francisco Mota klarifika família mak hakarak hulan mate-isin husi ospitál Maliana bá uma
Jornalista:Sergio da Cruz
Editór: Rafael Ximenes de A. Belo
