BOBONARU,07 Abríl 2025 (TATOLI)- Fransisco Viana Mota, nu’udar oan husi matebian José Mau Pelu Gomes, klarifika katak família sira mak deside hulan mate-isin husi ospitál Maliana bá matebian nia rezidénsia iha bairru Boracha-laran,suku Lahomea, postu administrativu Maliana, Munisípiu Bobonaru.
Hafoin Saudozu José Mau Pelu Gomes iis kotu iha loron Domingu, tuku 21:00, kalan, família deside hulan husi ospitál Maliana bá matebian nia uma tanba ho distánsia besik.
Notísia Relevante:PAM Bobonaro koordena ho Governu apoia karreta funeráriu ba servisu sosiál
“Horikalan-ami nia aman husik nia iis iha tuku 21:00, kalan,ami konsege kontaktu ho parte relevante sira ne’ebé mak apoia karreta no ami hetan ona informasaun katak karreta mai ona iha dalan atu mai translada mate-isin. Maibé ami barak depois besik entaun ami duni mak foti desizaun dehan ami leba bá de’it ona. La’ós dehan karreta la mai mak ami leba bá uma. Nune’e informasaun dehan kareta funeráriu la atende ami mak ami leba ne’e ha’u sente la loos”, dehan nia ba Jornalista sira iha rezidénsia Matebian,segunda ne’e
Iha fatin ketak, Sekretáriu Autoridade Munisípiu Bobonaru ba asuntu Sosiál no Organizasaun Komunitária, Julio Carvalho Caeiro, konsidera informásaun ne’ebé virál iha media sosiál ne’e la loos, tanba hafoin simu informasaun husi familia matebian katak sira ho hakarak rasik hulan mate-isin ba sira nia uma.
“Ita nia kondutór sira balun hela do’ok, entaun sei iha dalan, maibe familia sira mak telefone fila-fali dehan familia sira barak iha ne’e atu leba de’it ba uma, iha ne’ebá ami mos hatete imi hakarak leba mak ne’e keta halo aban akontese buat ida,mais agora virál ona mak ami klarifika katak ami toma responsabilidade hodi atende, maibé familia sira mak deside leba de’it ba uma”, nia afirma
Daudaun ne’e, Diresaun Servisu Munisipál Asaun Sosiál Koordena ona ho familia atu kompleta dokumentu, nune’e bele apoia karreta funeráriu bá halo’ot mate-isin iha semitériu ne’ebé familia deside.
“Diresaun Servisu Munisipál iha responsablidade morál atu apoia karreta funeráriu iha situasaun emerjensia”Nia katak
Diresaun Servisu Munisipál Asaun Sosiál Munisípiu Bobonaru iha karreta funeráriu unidade rua mak durante ne’e apoia familia transporte mate-isin ba suku no aldeia no planu iha tinan ne’e sei aumenta tan kareta unidade ida hodi responde ezijensia komunidade sira nia.
Notísia Relevante:Ambulánsia labele tula pasiente iha Sibuni-Bobonaro tanba estrada a’at
Jornalista: Sergio da Cruz
Editór: Florencio Miranda Ximenes
