DILI, 17 Fevereiru 2025 (TATOLI)–Deputada Bankada Governu husi Congresso Nacional da Reconstrução Timorense (CNRT), Carminda Carlota, klarifika, populasaun hulan pasiente ida husi Sibuni-Bobonaro, tanba estrada a’at no mota boot, la’ós tanba ambulánsia laiha.
“Ha’u atu sita de’it vídeo ne’ebé virál iha Facebook, tula avo ida moras husi Sibuni atu mai Bobonaro ne’e impaktu husi estrada no mota halo ambulánsia liu ladi’ak, entaun ita-nia povu hulan avo ne’e hodi ambulánsia no simu iha mota sorin. Ha’u iha vídeo kompletu iha ne’e, avo ne’e leva husi Sibuni atu mai Molu, tanba estrada a’at no mota boot, entaun ambulánsia husi Bobonaro tuun ba para de’it iha mota ninin, no sira leva avo ne’e liu mota hafoin tula avo ne’e mai iha Bobonaro,” Deputada hato’o liuhusi reuniaun plenária Parlamentu Nasionál (PN), segunda ne’e.
Notísia relevante :
Nia dehan, indivíduu balun halo edisaun vídeo la hasai ambulánsia maibé hasai de’it populasaun ne’ebé lori avo iha mota laran hodi partilla iha rede sosiál.
“Iha semana kotuk ha’u foti ona ponte Sibuni ho estrada Molo tanba difikulta tebes povu sira husi Sibuni no Molo atu mai iha postu Bobonaro,’’ nia akresenta.
Nune’e mós, Deputada CNRT, Maria Gorumali Barreto, hateten, iha tinan ne’e hafoin tinan 2024 nia rohan Timor-Leste no nasaun viziñu udan tau ho volume maka’as hodi rezulta mota boot, estrada kotu, no rai tahu.
“Ho kondisaun ne’e pasiente sira ne’ebé transfere mai husi postu saúde no sentru saúde labele mai iha fatin balun ne’ebé pasiente sira labele transfere ho ambulánsia. Ha’u foti ezemplu hanesan ohin Deputadu sira foti Sibuni nia kondisaun ne’e iha tempu kondisaun udan hanesan ne’e labele, mota ida iha ne’ebá kle’an karreta no ambulánsia saida labele liu,” nia tenik.
Deputadu opozisaun husi Nankada Frente Revolucionária de Timor-Leste Independente (FRETILIN), Antoninho Bianco, preokupa ho informasaun pasiente hulan de’it iha Sibuni.
Difisíl ultrapasa mota Laku
Diretór Servisu Munisipál Saúde munisípiu Bobonaru, Gíl Bernardo Vicente, klarifika karreta ambulánsia husi Sentru Saúde Komunitária postu iha administrativu Bobonaro labele bá tula pasiente Casilda dos Santos Maia idade (61) iha suku Sibuni ho razaun tanba difisíl tebes karreta bele ultrapasa ba mota Laku no kondisaun estrada mós ladi’ak.
Diretór ne’e konsidera informasaun ne’ebé espalla iha rede sosiál ne’e hoax ka la loos tanba molok hulan pasiente ne’e parte husi Sentru Saúde Komunitária Bobonaru ho fámilia iha ona konkordánsia katak ambulánsia hein no tula de’it iha mota sorin parte aldeia Oalgomo, suku Ai-Asa.
“Ita-nia karreta ambulánsia hein de’it iha mota sorin, labele ba liu Sibuni tanba mota, rai-henek nakonu loos depois fatuk mós barak tan, kareta labele liu, entaun família sira hulan mai mak karreta ambulánsia tula ba sentru saúde Bobonaru,” nia informa ba Agência Tatoli via telefónika, segunda ne’e.
Nia hateten, pasiente ne’e mai ho moras stroke iha ain no liman sorin mate, nune’e pesoál saúde Sentru Saúde Komunitária Bobonaru deside transporta kedas mai ospitál referál Maliana no iha momentu ne’e halo kedas tranferénsia ba Hospital Nacional Guido Valadares (HNGV) Dili tanba kondisaun grave. Daudaun ne’e pasiente ne’e halo hela tratamentu iha HNGV.
Jornalista : Nelson de Sousa
Editora : Julia Chatarina
