DILI, 06 Novembru 2025 (TATOLI)—Primeiru-Ministru, Kay Rala Xanana Gusmão, konsidera rekomendasaun husi komisaun C ne’ebé trata kona-ba asuntu finansa públika atu aumenta taxa impostu, maibé iha situasaun atuál seidauk nesesáriu.
“Se ita aumenta impostu maske ita atu kobre to’o iha ne’ebé mós sei la ajuda ita-nia OJE. Atu hateten de’it katak husi organizasaun g7+ nian ami la’o ona ba nasaun balun hodi halo observasaun. Iha balun ekonómia araska tebe-tebes no balun riku tebe-tebes maibé sira iha hela konflitu nia laran,” Primeiru-Ministru, Kay Rala Xanana Gusmão, relata iha debate OJE 2026, iha PN, kinta ne’e.
Kuaze iha nasaun balun mak riku tebes ho rekursu minerál maibé sira labele dezenvolve rasik no mafia balun mak aproveita sira-nia rikusoin, nune’e bainhira Timor-Leste hakarak aumenta impostu para iha reseita doméstika ne’e TL lalika hanoin liu ba ida-ne’e tanba aumenta impostu sé mak atu ba sosa.
Singnifika, nai dehan, populasaun sei la ba sosa, enkuantu sira ne’ebé gaba-an iha kargu boot mak bele ba sosa maibé povu sei susar tebe-tebes.
“Ho nune’e kona-ba reseita doméstika parte Parlamentu nasionál hakilar nafatin ami ba atu redús despeza tanba ita-nia ekonómia seidauk la’o di’ak no sei probema boot. Entaun ho de’it reseita doméstika ita sei la avansa ba oin,” nia hateten.
Nia hatutan, deputadu sira iha hanoin di’ak bele ko’alia ba-mai maibé ba nia parte sei la simu dehan atu aumenta impostu.
Jornalista : Alexandra da Costa
Editór : Cancio Ximenes
