DILI, 10 Novembru 2025 (TATOLI)–Komandu FALINTIL–Forsa Defeza Timor-Leste (F-FDTL) liuhusi Komandante Komponente Navál Komodoro Higino das Neves, Segunda ne’e, fó pose ba Kapitaun Fragata Graduadu Nicolau Sousa hodi asume kargu nu’udar Segundu Komandante Komponente Navál.
Serimónia pose ne’e bazeia ba despaisu husi Xefe Estadu Maiór Jenerál Forsa Armada XEMGFA), Domingos Raul ‘Falur Rate Laek’, númeru 064/CEMG das FALINTIL-FDTL/IX/2025 hodi asume kargu nu’udar Segundu Komandante Komponente Navál, hahú husi loron 30 Outubru 2025 hodi substitui Segundu Komandante Komponente Navál sesante, Kapitaun Fragata Guido Guterres da Silva.
Aleinde ne’e, desizaun ne’e mós bazeia ba Lei Orgánika Militár hodi asume kargu durante tinan-rua.
Enkuantu, Segundu Komandante Komponente Navál sesante, Kapitaun Fragata Guido Guterres da Silva, liuhusi despaisu husi XEMGFA, Domingos Raul ‘Falur Rate Laek’, númeru 195/DIV.Pesoál/QG-F-FDTL hodi asume fali funsaun hanesan Adjuntu Inspesaun iha Kuartél Jenerál, Fatuhada.
Notísia relevante : MD apresia Komponente Navál hahú dezenvolve-án
Iha biban ne’e, Komodoro Higino das Neves otimista katak Kapitaun Fragata Graduadu Nicolau Sousa sei halo nia serbisu ho di’ak.
“Ha’u fiar katak Kamandante Nico la’ós ofisiál foun, maibé nia husi Komponente, nia hatene ha’u-nia serbisu tanba nia hamutuk ho ha’u durante tinan-rua, ne’e duni hatene saida mak nia bele halo,” Higino das Neves hato’o iha ámbitu serimónia pose ba Segundu Komandante Komponente Navál, Kapitaun Fragata Graduadu Nicolau Sousa, iha Baze Navál, Hera.
Nia parabeniza ba emposadu ne’ebé Komandu nomeia ba Segundu Komandante Navál.
“Parabens ba ita, responsablidade aumenta, fiar katak ita sei serbisu ho ha’u no ofisiál sira ne’ebé iha Komponente Navál nune’e bele halo knaar ho di’ak. Lori Komponente Navál bá dalan ne’ebé ita hotu hein,” nia kongratula.
Iha biban ne’e mós Komodoro Higino kongratula Kapitaun Fragata Guido Guterres ne’ebé hetan fiar husi Komandu hodi halo fali knaar iha Kuartél Jenerál no dezeja bele serbisu ho di’ak.
Komodoro Higino konsidera, mudansa ne’ebé mosu iha Komponente Navál ne’e nu’udar tranzisaun ida-ne’ebé Komandu F-FDTL hahú halo atu neneik bele entrega forsa ba jerasaun foun.
Nia dehan, durante nia mandatu hanesan Komandante Komponente Navál, iha ona Segundu Komandante tolu, ida mak Julião ne’ebé ohin loron sai Superiór iha Autoridade Marrítima Nasionál, Kapitaun Fragata Guido no agora Kapitaun Fragata Graduadu Nicolau.
“Signifika faze ida ba ona atubele trazita knaar sira ne’e ba jerasaun foun. Tanba ne’e, ita sei fiar katak lori forsa ne’e ba oin,” nia katak.
Komponente sei serbisu hamutuk ho Segundu Komandante Komponente Navál hodi dezenvolve ho di’ak.
“Hamutuk ita iha ne’e para ajuda iha apoia no suporta atubele susesu iha nia knaar. Ita hotu serbisu hamutuk hodi bele lori Komponente Navál ne’e ba mehi ne’ebé ita-nia polítiku sira mehi atu sai forsa ne’ebé bele satan ita-nia rikusoin iha tasi, la’ós rikusoin de’it, maibé lori Timor-Leste nia bandeira bá iha mundu,” nia katak.
Komandante Higino hatutan: “Ida-ne’e misaun ida-ne’ebé todan, maibé ha’u fiar sé ita hamutuk, ita bele serbisu hamutuk, rona malu, no fiar malu, mai ita sei susesu iha misaun,” nia otimista.
Nia husu ba membru Komponente Navál atu nafatin hatudu displiña di’ak atu tane nafatin integridade institusaun F-FDTL.
Jornalista : Natalino Costa
Editora : Julia Chatarina
