DILI, 10 novembru 2025 (TATOLI)–Komandante Komponente Navál, Komodoro Higino das Neves bandu membru Komponente Navál uza atributu militár halo Tiktok.
“Hau apela bebeik iha ne’e, labele loron-ida tanba de’it ita-nia gensi mak ita hasai ita-boot sira-nia boiña bá deskasa iha uma. Di’ak liu evita ona tanba hatene ona katak labele hatais farda no uza atributu militár hodi halo Tiktok iha rede sosiál, ne’e la autoriza,” Komodoro Higino hato’o iha ámbitu serimon’ia pose ba Segundu Komandante Komponente Navál, Kapitaun Fragata Graduadu Nicolau Sousa, iha Baze Navál Hera, Segunda ne’e.
Komodoro hateten, bainhira hakarak ativu iha rede sosiál bele uza faru sivíl, maibé labele uza atributu militár.
“Se ita-boot sira hakarak halo ida-ne’e, halo ho sivíl, maibé nunka uza atributu militár halo Tiktok. Halo foto ne’e di’ak, maibé Tiktok ida-ne’ebé estraga imajen forsa la autoriza,” nia fó hanoin.
Notísia relevante : Kapitaun Fragata Graduadu Nicolau Sousa simu pose nu’udar Adjuntu Komandante Komponente Navál
Komandante Neves nota katak militár feto sira dalaruma gosta ativu iha rede sosiál, tanba ne’e presiza prevene.
“Ne’e mak kontinua apela ida-ne’e ba ita-boot sira, liuliu ha’u haree feto barak mak iha Tiktok, ne’e mak ha’u apela ida-ne’e para depois bele prevene,” nia katak.
Tuir nia, hahalok sira ne’e maka dalaruma militár ida bele sai husi instituisaun.
“Sé komportamentu nafatin liga ba hahalok sira-ne’ebé halo ne’e mak nafatin, mak ita sei bele haree katak ladi’ak sei hasai. Ita mai iha forsa atu kontinua hamorin prestijiu FALINTIL nian ne’ebé tane a’as valores ne’ebé FALINTIL husik hela,” nia tenik.
Komodoro hatutan: “Ita hatais farda hodi reprezenta sira hodi hatutan sira-nia mehi ne’ebé sira la konsege atinje, sira mate sira entrega mai ita. Ne’e mak husu nafatin ba ita-boot sira atu aprezenta, tane a’as no respeita farda ida-ne’e.”
Jornalista : Natalino Costa
Editora : Julia Chatarina
