VIKEKE, 11 Novembru 2025 (TATOLI)—Ekipa Ministériu Agrikultura, Peska, Pekuária no Floresta (MAPPF) liuhusi Diresaun Veterinária hahú fó vasina ba komunidade nia asu no busa atu prevene vírus rabies iha Munisípiu Vikeke.
“Ohin ita-nia téknika veterinária nasionál hamutuk na’in-lima (5) mak destaka mai Vikeke la’o hela iha komunidade nia uma iha área Suku Karaubalu hodi halo identifikasaun ba animál sira liuliu asu, busa no bainhira sira hetan fó kedas vasina,” Olívio Soares Freitas ba jornalista sira iha Postu Vikeke Vila, Tersa ne’e.
Olívio haktuir, antes ne’e MAPPF Vikeke halo sosializasaun ba komunidade no autoridade lokál sira kona-ba vírus rabies no liga ba prevensaun vírus referidu nune’e ekipa téknika sira agora ba direta iha komunidade nia uma hodi fó vasina.
Notísia relevante: SMAPPF Vikeke preparadu prevene vírus raiva
Iha fatin ketak, Xefe Ekipa Vasinadór Rabies Nasionál, Natalino do Carmo Goveia hateten programa vasinasaun ne’e atu halo prevensaun ba moras rabies tama ona Timor-Leste, maski Munisípiu Vikeke seidauk rejistadu kazu rabies.
“Ba programa vasinasaun ne’e ami lori stock ai-moruk rabies hamutuk doze rihun 25,” nia haktuir.
Nia relata, ekipa sei halo vasinasaun durante loron sanulu (10) iha Munisípiu Vikeke no iha vasinasaun ne’e fahe ba ekipa haat no kada ekipa kompostu husi ema na’in haat (ema na’in-ida sona, na’in-ida halo aprosimasaun ba animál nia na’in sira, na’in ida lori ekipamentu no na’in ida foti dadus animál).
Entretantu, abitante Karaubalu, Isabel Soares hato’o agradese ba ekipa veterinária ne’ebé mai fó ona vasinasaun ba komuninidade nia asu no busa.
“Ha’u koopera ho sira para fó vasina ba ha’u-nia asu hamutuk tolu no busa,” nia hato’o.
Ekipa vasinasaun kompostu husi nasionál na’in-lima (5) no munisípiu na’in-15.
Jornalista: Vitorino Lopes da Costa
Editór: Xisto Freitas da Piedade
