DILI, 17 Novembru 2025 (TATOLI)—Ekipa Buibere Football Club lidera tabela klasifikasaun primeira divizaun Liga Futeból Femininu Timor-Leste (LFFTL) jornada dahaat hafoin rekolla produtividade golu +42.
Buibere FC invade pozisaun S’amuser FC ne’ebé tun ba pozisaun daruak mezmu ekipa rua referida rekolla pontu hanesan 12, rezultadu manán dahaat maibé tuir regra kontajen produtividade elementu Octavianus Pinto liu golu lima (5) bainhira kompara ho S’amuser FC ne’ebé produtividade golu +37.
AD SLB Laulara mantein iha pozisaun datoluk bainhira rekolla tan pontu tolu (3) husi VDL FC nune’e totál pontu sanulu (10), rezultadu manán 3 no impata ida (1) inklui produtividade golu +33, enkuantu Maudoko FC iha pozisaun dahaat ho pontu sanulu (10) hafoin manán 3 no impata ida (1) maibé totál golu +17.
Notísia relevante: Buibere FC lakohi haksolok ho rezultadu jogu LFFTL
Aleinde ne’e, ekipa Maranatha FC sa’e husi pozisaun dahitu ba pozisaun dalimak hafoin iha jogu jornada dahaat gaña vitória husi UNITAL FC nune’e rekolla pontu lima (5), rezultadu manán ida (1) no impata rua (2) no derrota ida (1), enkuantu Akadémika FC okupa iha pozisaun daneen hafoin rekolla pontu tolu (3).
Pozisaun dahitu okupa husi UNITAL FC ho pontu tolu (3) hafoin manán ida (1) no derrota tolu (3) inklui menus produtividade golu-17, enkuantu VDL FC iha pozisaun daualu ho pontu tolu (3), rezultadu manán ida (1) no derrota tolu (3) maibé menus golu barak hamutuk 26.
Entretantu, ekipa Na’in-Feto FC to’o jornada dahaat seidauk rekolla pontu (0) hafoin derrota haat (4) no menus produtividade golu hamutuk 29, okupa iha pozisaun dasiak no Kulugisa FC iha pozisaun dasanuluk ho pontu 0 hafoin derrota jogu haat (4) no menus golu 34.
Jornalista: Natalino Belo
Editór: Xisto Freitas da Piedade
