DILI, 17 Novembru 2025 (TATOLI)—Parlamentu Nasionál (PN) liuhusi diskusaun iha faze espesialidade, Segunda ne’e, aprova Ministériu Edukasaun (ME) nia orsamentu ba tinan 2026 ho montante $117.550.930, ho rezultadu votu afavór 43, kontra 0 no abstensaun 21.
ME nia orsamentu ne’ebé prevee iha Orsamentu Jerál Estadu (OJE) 2026 kompostu husi saláriu no vensimentu $93.624.245, bens no servisu $10.021.005, transferénsia públika $4.852.080, kapitál menór $2.000.000 no kapitál dezenvolvimentu $7.053.600.
Orsamentu sira ne’e sei aloka ba programa prioridade lima mak hanesan funsionamentu dezenvolvimentu institusionál, edukasaun pré-eskolar, ensinu báziku, ensinu sekundáriu jerál tékniku vokasionál, ensinu rekorrente, no sub-programa hamutuk 39.
Notísia relevante : Governu konsidera lian materna la’ós imperativu maibé inísiu aprende lian ofisiál
Deputada Bankada Frente Revolucionária do Timor-Leste Independente (FRETILIN), Cristina Yuri Ribeiro tau kestaun, oinsá ME atu garante materiál didátiku atu dezenvolve lian materna iha futuru.
Ministra Edukasaun, Dulce de Jesus Soares, ME to’o agora implementa ona programa lian materna iha munisípiu tolu ne’ebé ko’alia lian baikenu, galolen no fataluku.
“Bainhira ita hanoin atu espande lian materna ba munisípiu seluk, normalmente tenke haree filafali iha área ne’ebé komunidade ko’alia lian ida de’it, atu nune’e la hateten katak Ministériu Edukasaun atu halo programa lian materna iha lian hotu-hotu,” nia katak.
Governante ne’e esplika tan, programa lian materna la halo iha nível ensinu sira ne’ebé a’as ka ensinu sekundáriu maibé simplismente halo iha nível baixu iha área remota, liuliu área ne’ebé deskrobre katak komunidade ko’alia liu lian materna.
Durante diskusaun, deputadu sira husi bankada opozisaun FRETILIN propoin proposta alterasaun rua nú 47 no nú 57 ba ME, maibé ikus mai proponente sira deside retira.
Jornalista : Alexandra da Costa
Editór : Cancio Ximenes
