MS halo ona investigasaun ba kazu vasina bebé mate iha Likisá
DILI, 17 Novembru 2025 (TATOLI)—Inspetór Jerál Saúde Gabinete Inspesaun no Auditoria Saúde (GIAS) iha Ministériu Saúde, Horacio Fernandes, informa ekipa investigasaun husi Ministériu Saúde halo ona invetsigasaun ba kazu bebé ne’ebé mate banhira hetan vasina iha Munisípiu Likisá.
Notísia Relevante: Komisaun F husu MS halo investigasaun kle’an ba kazu bebé mate iha Likisá
“Ekipa invetsigasaun husi espesialista imuniazasaun (NTAG) ho Diresaun Nasionál Saúde materna infantil husi Ministériu Saúde halo ona investigasaun no rezultadu refere sei aprezenta ba Ministra Saúde hodi fó sai ba publiku ga delaga fila-fali mai iha Gabinete Inpesaun Auditoria hodi internalmente halo investigasaun ka ba Ministériu Públiku ida-ne’e depende ba rezultadu ne’ebé mak iha,” Horacio Fernandes hateten ba jornalista sira, iha Timor-Plaza, ohin.
Nia relata, tuir informasaun ne’ebé mak iha katak rezultadu investigasaun ne’e entrega ona ba Ministra Saude, tanba ne’e hein desizaun sira tuir mai.
“Ami rona informasaun loron rua liu ba katak rezultadu investigasaun hato’o ona ba Ministra Saúde, maibé daudaun ne’e Ministra Saúde sei okupadu ba OJE 2026, nune’e ita hotu hein dezisaun tuir mai,” nia dehan.
Tanba ne’e, Gabinete Inspesaun halo mós fiskalizasaun dixiplina ba funsionáriu hotu-hotu liuliu iha servisu nasionál, ospital referál, sentru saúde sira to’o postu saúde, entaun GIAS hanesan dever ida atu halo fiskalizasaun hodi haree funsionáriu sira-nia servisu hanesan funsionáriu públiku ida.
“Agora kazu Likisá ne’e, nia sansaun depende ba Ministra Saúde atu fó sansaun adminsitrativa ka sansaun krime ida maibé depois investigasaunhotu mak ita haree ba ida-ne’eba,” nia hateten.
Antes ne’e, Prezidente Komisaun F ne’ebé mak trata Asuntu Saúde, Siguransa Sosiál no Igualidade, Maria Gorumali Barreto, hateten relasiona kazu ida-ne’ebé mak akontese iha 29 Outubru 2025 ne’e, halo atendementu ba bebé maibé to’o ikus raan sai maka’as no ikus lakon nia vida no kazu ne’e sériu presiza halo investigasaun kle’an.
“Ha’u hanoin presiza loke investigasaun atu bele hatene didi’ak, tanbasá mak to’o akontese sai ameasa ba ema-nia vida. Tnke halo prosesu investigasaun ho nune’e ita bele hateten katak problema ne’e mai husi ne’ebé. Se husi estajiadu mak la hateten durante nia simu siénsia iha aula ne’e, nia la komprende didi’ak oinsá atu sona bebé diferensa entre sona bebé ho ema boo. Ne’ebé, ha’u hanoin presiza halo investigasaun, ho nune’e ita bele hatene didi’ak sala ne’e mai husi parte ida-ne’ebé,” Maria Gorumali Barreto hateten ba jornalista sira iha resintu Parlamentu Nasionál, kuarta (05 Novembru 2025).
Jornalista : Felicidade Ximenes
Editór : Cancio Ximenes
