DILI, 17 Novembru 2025 (TATOLI)–Prezidente Tribunál Rekusu (PTR), Afonso Carmona hamutuk ho estrutura Tribunál Rekursu, Segunda ne’e, presta omenajen ba falesimentu espoza husi atuál Ministru Justisa, Sérgio Hornai, saudosa Nélia Maria Madalena da Silva, ne’ebé hakotu iis iha tuku 09:00, Domingu (16/11) tanba kauza husi moras komplikadu.
Tuir Carmona, saudoza ema di’ak no ema ne’ebé pasiénsia, tanba ne’e ho nia auzénsia, halo parte hotu liuliu família sente lakon.
“Ita iha ligasaun di’ak, nia mós ema rezisténsia, entaun durante ne’e ami sempre iha ligasaun ne’ebé di’ak, entaun ho asidente atakasaun ne’e hanesan Prezidente Tribunál Rekursu ita sente lakon ema di’ak,” Carmona hateten ba Ajénsia TATOLI hafoin presta omenajen iha rezidénsia Ai-Mutin.
Notísia relevante :
Prezidente Tribunál Rekursu konta, kuandu sira ho Ministru Justisa iha Singapura, haree ema hahú publika iha pájina facebook, saudoza Nélia nia fotografia no tau Deskansa Em Pás (DEP).
“Entaun, señór Ministru Justisa iha aviaun laran komesa hatudu oin triste. Hanesan ohin ha’u dehan katak ita-nia ema lakon tanba nia sei poténsia. Ita espera katak ho ne’e bele fó korrajen no forsa ba Ministru Justisa (Sérgio Hornai). Ohin ita mai presta omenajen ba falesimentu espoza Ministru Justisa,” nia akresenta.
Biográfia saudosa Nelia Maria Madalena da Silva
Saudosa Nélia Maria Madalena da Silva (naran estimada Nonoi) moris iha Baukau iha loron 22 Juñu 1975. Nia nu’udar oan husi Manuel da Silva (falesidu) no Paulina da Costa Soares (falesida), saudosa nu’udar oan dalima husi maun-alin sira na’in-sia.
Saudosa remata nia estudu prinsipál iha Salesiano Dom Bosco Baucau, depois kontinua atu hetan lisensatura iha Akademia Keuangan dan Perbankan (AKABA) iha Bali, Indonézia, iha tinan 1997.
Durante nia moris, saudosa mos partisipa ativamente hanesan membru juradu iha organizasaun Resistência Nacional dos Estudantes de Timor-Leste (RENETIL) ho kódigu Wen, iha departamentu AGIPRO, rejiaun Aitana, husi tinan 1995.
Saudosa hakotu iis iha Hospital Nacional Guido Valadares (HNGV) iha loron 16 Novembru 2025 hodi husik hela nia kaben Sérgio Hornai no oan sira na’in-lima.
Saudosa hahú nia karreira profisionál hanesan funsionária iha CARITAS Baukau husi tinan 1999–2005.
Depois, kontinua hanesan funsionária públika iha Ministériu Obra Públika (MOP) husi tinan 2008 to’o loron nia hakotu iis. Durante nia serbisu, saudoza asume kargu hanesan Téknika Profisionál iha Diresaun Nasionál aprovizionamentu iha MOP.
Hafoin saudoza hakotu iis iha Domingu ne’e, Primeiru-Ministru, Kay Rala Xanana Gusmao no membru IX Governu Konstitusionál bá kedan iha Ministru Justisa Sérgio Hornai nian rezidénsia Ai-Mutin hodi presta omenajen ba falesimentu nia espoza.
Nune’e m’os, iha Segunda ne’e, Antigu Primeiru-Ministru, Taur Matan Ruak inklui membru Governu seluk no família sira presta mós omenajen ba saudoza.
Jornalista : Natalino Costa
Editora : Julia Chatarina
