BOBONARU, 20 Novembru 2025 (TATOLI)-Komisaun Nasionál Eleisaun (CNE, sigla portugués) no Sekretariadu Tékniku Administrasaun Eleitorál (STAE) organiza atividade edukasaun sívika hodi introdús lei no lala’ok eleisaun munisipál ba funsionariu sira iha Bobonaru.
Tema ba programa ne’e mak “Promove partisipasaun inkluziva ba eleisaun munsipál iha Estadu direitu demokrátiku”.
STAE akompaña CNE halo sensibilizasaun lei númeru 22/2021, Lei Eleitorál Munisipál no lei 23/2021 kona-ba Lei Podér Lokál no Desentralizasaun Administrativa.
Aleinde ne’e, sosializa mós lei númeru 19/2021 kona-ba Resenseamentu Eleitorál ka atualizasaun baze dadus no biométriku.
Vise-Prezidente CNE, Domingos Berreto, hateten atividade ne’e realiza hanesan faze preparasaun atu hasoru eleisaun Kámara Munisipál ne’ebé sei realiza iha tinan hirak tuirmai.
Notísia relevante: CNE introdús lala’ok eleisaun kámara munisipál iha Cailaco
“Lolos ne’e edukasaun sivíka ne’e ami halo ba komunidade no estudante sira, maibé hanoin halo mós ba funsionariu sira, tanba dalabarak funsionariu sira mós la komprende kuandu to’o eleisaun no kampaña sira mós viola lei. Funsionáriu iha devér atu hatene lei, tanba ida-ne’e mak ita fó hanoin ba malu, kuandu funsionariu mak viola lei ruma ninia pena ne’e boot liu komunidade”, nia hateten iha salaun Maria Tapó.
Diretór STAE munisípiu Bobonaru, Mariano Viegas Amaral, dehan edukasaun sívika ba funsionariu sira ne’e foin akontese no ida-ne’e importante tanba iha eleisaun liubá funsionariu barak mak viola lei.
“Ami hatene katak barak mak komete erru iha eleisaun sira liubá. Iha oras serbisu bá partisipa kampaña uza transporte Governu nian. Buat sira ne’e ita presiza fó hanoin ba malu para labele komete tan”, salienta.
Seketariu Autoridade Bobonaru ba Asuntu Administrasaun no Finansa, Domingos da Costa, konsidera programa ne’e pertinente tanba bele hasa’e funsionariu sira-nia koñesimentu kona-ba lei no eleisaun Kamara Munisipál.
“Sira hato’o mai ita saida mak funsionariu nia devér no direitu iha eleisaun munisipál. Tanba lei dehan funsionariu labele partisipa iha kampaña eleitorál iha oras serbisu, depois lori patrimóniu Estadu bá tuir kampaña”, salienta.
Atividade ne’e partisipa másima husi funsionariu Diresaun Servisu Munisipál no Delegasaun Territoriál ne’ebé eziste iha Bobonaru.
Notísia relevante: CNE promove debate públiku entre partidu polítiku iha Bobonaru
Jornalista: Sérgio da Cruz
Editora: Maria Auxiliadora
