BOBONARU, 05 Setembru 2025 (TATOLI) – Komisaun Nasionál Eleisaun (CNE, sigla portugés) realiza edukasaun sívika ho modelu dabate publiku nivel lokál entre partidu polítiku (Parpol) asentu parlamentár ne’ebé eziste iha munisípiu Bobonaru hanesan CNRT, FRETILIN, PD, PLP no KHUNTO.
Prezidente CNE, José Agustinho Belo, dehan CNE oferese palku ba debate públiku ho tema “Ita prontu ba eleisaun kámara munisipál” ne’e atu lideransa parpól sira hato’o konseitu, vizaun, estratejia no projesaun partidu nia ba futuru munisípiu Bobonaru bainhira hakat ba poder lokál.
“Debate ida-ne’e la’ós mai sukat sé mak forte liu, sé mak di’ak liu, maibé ida-ne’e hanesan meiu ida CNE oferese ba futuru líder munisípiu no nasionál atu evita koalia destinu nasaun nia iha li’ur, fatin ne’ebé la apropriadu, fatin ne’ebé la’ós ba ema polítiku sira atu ko’alia. Entaun, fatin ida ne’ebé dignu liu maka debate ho modelu sira hansan ne’e”, nia hateten iha intervensaun ba atividade ne’ebé realiza iha salaun Maria Tapó. ohin.
Dirijente CNE ne’e subliña katak programa ne’e realiza atu líder partidu polítiku sira abitua no familiár ho debate públiku.
José Bello husu partidu sira ne’e atu debate ho koseitu ilektuál hodi fó hanoin kona-ba futuru munisípiu Bobonaru atu sai di’ak liután.
“Aban bainrua kámara munisipál mai ona ne’e tenke Bobonaru oan sira mak fó liman ba malu, prepara nia terrenu, hanoin para matenek hotu-hotu ne’ebé durante ne’e hetan nakfilak ida-ne’e ba moris di’ak rai ida-ne’e. Tanba ne’e, CNE fiar katak liuhusi debate ita-boot sira-nia lian, hanoin no komportamentu ne’ebé imi hatudu ne’e fó fiar ba populasaun katak moris di’ak ne’e ita sira mak tenke diskute”, nia salienta.
Prezidente Autoridade Munisípiu Bobonaru, Paulo Moniz Maia, konsidera liuhusi debate ne’e líder parpól sira bele hatene liután saida mak demokrasia.
“Katak minoria tenke submete ba maioria, ne’ebé aban bainrua sei mosu karik eleisaun ruma. Tanba ne’e, ha’u husu debate bele debate, maibe tenke konstrutivu, labele ibun mak temi dehan konstrutivu mais debate ida destruitivu ne’e labele akontese iha ne’e. Ha’u hakarak Bobonaru ne’e hatudu ezemplu ida di’ak ba munisípiu sira seluseluk”, dehan.
CNE organiza atividade ne’e haktuir ba planu Governu nia ne’ebé sei realiza Eleisaun Órgaun Reprezentativu Munisipál iha tinan 2027.
Debate ne’e hetan partisipasaun masima husi kuadru partidu polítiku, autoridade postu administrativu, diretór delegasaun territoriál, líder komunitária no intelektuál Bobonaru no estudante universitariu sira.
Notisía relevante: CNE-PAM Kovalima rekomenda ba debatór parpol labele insulta malu
Jornalista: Sergio da Cruz
Editora: Maria Auxiliadora
